'Fun Nights' sa Lapulapu

Usa ka maanindot nga konsepto kining bag-ong proyekto sa kagamhanan sa dakbayan sa Lapulapu diha sa Mactan Shrine kada alas 6 sa gabii matag adlaw’ng Sabado.

Kining “Fun Nights in Lapu-Lapu kada Sabado sa gabii usa ka programa nga mag-agni sa mga lokal nga turista pagduaw sa isla.

Tungod niini, dili lamang mga international tourism program ang nahimo sa siyudad tungod kay naninguha usab kini nga ang mga taga-dakbayan sa Sugbo ug sa mga duol nga lalawigan makaduaw niini usa ka adlaw matag semana.

Nailhan na nato ang dakbayan nga bisitahanan sa mga pamilya matag Domingo ug panahon sa mga holiday ug adto sa mga maanindot ug alegreng kabaybayonan magpunsisok aron pagtugsad sa bugnaw’ng dagat ug pagdagandagan sa maanindot nga balas sa baybayon.

Apan karon, aduna nay bag-ong konsepto alang sa mga lokal ug langyaw’ng mga turista pagpatapok kanila diha sa Mactan Shrine aron pagsaksi sa mga kalingawan ug paglingkod sa mga lingkoranan aron tilawan ang lami-an nga mga putahi nga giluto sa mga kababayen-an sa Lapulapu.

Pang-pamilya kining bag-ong programa.

Kun gusto sa mga ginikanan nga malingaw ang ilang mga anak sa usa ka maanindot nga cultural show ug makatilaw usab sa mga lami-ang luto sa Mactan, nindot ninyong suroyon ang Mactan Shrine matag Sabado sa alas 6 sa gabii.

Nindot usab seguro kini alang sa mga senior citizen nga gustong maglingaw sa kaugalingon.

Nagplano kami sa akong pamilya sa pagduaw sa Mactan Shrine usa ka Sabado aron masinati namo kining “Fun Nights” aron makasabwag usab kita sa uban nga gustong malingaw sa ingon niini nga mga pasundayag.

Kun moadto ka sa Thailand, ang mga cultural shows didto mahal kaayo og bayad.

Nakasulay ko pagsulod anang ilang Tiffany show nga pulos mga “transvestite” ang nagpasundayag. Pero puwerteng kamahal sa ilang entrance.

Didto usab kami sa Nong Nooch nga adunay pasundayag sa mga elepante, pero mao gihapon dili ka makasulod kun wala kay linibo.

Ang labing nindot nga show nga akong naadtoan didto sa Thailand mao kadtong Siam Niramit nga nagpasundayag sa kasaysayan sa mga Thai ug sa Thailand. Mao kadtoy labing mahal nga show nga akong naadtoan, kay tiaw mo bay sa ilang entablado adunay dako kaayong sapa nga puede kaligoan.

Ang mga pasundayag makapa-agni kaayo og mga turista. Dinhi sila mahimong malingaw gawas sa mga kan-anan, imnanan, kaligoan ug puy-anan.

Angay gyud suportahan kining mga programa nga makapadani og mga turista, sama niining Fun Nights in Lapu-Lapu.

Nahimo lamang kini sa dihang ang kagamhanan sa Lapulapu gidumala og usa ka babaye nga mayor, si Mayor Paz Radaza.

Makaingon kita nga nindot gyud kining babaye ang chief executive kay mogawas ang pagka-creative.

Pero ang pag-umangkon ni Mayor Paz nga si Konsehal Harry Radaza dali man usab kaayo maka-konsepto og mga programa nga makapa-agni og mga bisita nga moduaw sa Mactan islands.

Si Konsehal Harry dako kaayo og papel niadtong Davis Cup nga maoy unang kalihukan nga nakapahimong sikat sa Lapulapu sa tibuok kalibutan. Pinaagi nilang Mayor Paz ug Konsehal Harry, nahimong “sports tourism capital” ang Lapulapu.

Samot na kun mahuman ug mahimong operational kanang Megaworld Project, malupigan na gyud ang tourism program sa lalawigan.

* * *

Kay naghisgot man kita og tourism project, maayong balikbalikon nako sa paghisgot ang ambisyoso namong proyekto sa dakbayan sa Minglanilla ang Eco-Agrotourism Project sa barangay Cadulawan ug Vito.

Nindot ang konsepto nga gidesinyo sa Rotary Club of Cebu Minglanilla alang sa 54 hektaryas nga luna sa mga mag-uuma nga benepisyaryo sa Comprehensive Agrarian Reform Program.

Ang misyon sa Rotary nga makapadayon ang mga mag-uuma sa pagtikad sa ilang mga yuta aron sila makabayad sa ilang obligasyon ngadto sa gobyerno isip bayad og buhis sa ilang luna nga naangkon.

Kun makapadayon sa pagtikad ang mga mag-uuma, kuli nga mapalit gikan kanila ang ilang mga luna. Ang Rotary naglantaw nga dili mapunta sa mga developer ang mga luna sa mga mag-uuma.

Sulod sa 21 ka tuig, adunay NGO nga nagkanunayan sa Cadulawan ug Vito. Apan sulod nianang mga panahona, wala’y tiunay (genuine) nga tabang nga nahatag ngadto sa mga mag-uuma mao nga kadaghanan kanila nagsugod na sa pagpamaligya sa ilang mga “rights” ngadto sa mga adunahan.

Ang kaparian sa Immaculate Heart of Mary Shrine sa Minglanilla ug ang mga opisyal sa lungsod nakakita niini nga usa ka hulga nga mahanaw gikan sa mga mag-uuma ang ilang mga luna, inay mapasa ngadto sa ilang mga anak ug sa mga anak sa ilang mga anak.

Kining Eco-Agrotourism maghatag kanila og sustenable nga kalambuan sa kinabuhi pinaagi sa ilang pagpananom ug paghimo sa ilang “cultural and geographical landscape” nga usa ka maanindot nga talan-awon sa mga turista.