EDITORIAL - Banat News 18- ka tuig nang naglawig

Sa nanglabay’ng katuigan, ang publiko uhaw kanunay og impormasyon sa mga panghitabo sa ilang palibot, impormasyong may kalambigitan sa ilang kinabuhi ingon man mga kalingawan paghupay sa kalaay.

Karong adlawa mag-18 na ka tuig ang Banat News nga kinaham nga basahon sa Central Visayas. Niadtong Agosto 23, 1994 dihang giestablisar kini sa pamilyang Gullas nga maoy nanag-iya sa The Freeman.

Sa sulod sa maong mga nanglabay’ng katuigan, daghan nang kausaban nga gihimo aron ipahaom ang unod sa matag pahina niini sa gipangita sa mga bumabasa. Sa modernong panahon nga duna nay internet, ang print media sama na lang sa Banat News wala magpalupig sa teknolohiya tungod kay sayod man kini nga dili tanang tawo ang dunay access sa internet.

Gipanindot niini sulod sa 18 ka tuig ang mga unod sa matag panid aron mapuno sa impormasyon, balita, tsismis ug kalingawan alang niadtong dili lang makamaong mogamit sa internet. Ang kaniadto nagsugod lamang sa mga balitang dili katuohan nahimo karong kinaham sa mga nanginahanglan sa mga Binisayang balita.

Mas mikusog ug milapad pa gyud ang demand sa Banat News dihang nasakop kini sa The Philippine Star Group of Publications sa pamilyang Belmonte niadtong tuig 2004. Sukad niadto naabot na sa gawas sa Sugbu ug karon duna nay sirkulasyon sa matag dagkong siyudad sa Central Visayas ug pipila ka mga dagkong siyudad sa amihanang bahin sa Mindanao ang Banat News.

Dungan sa pagsaka sa demanda misaka usab ang kalidad sa Banat News apan dili kini tungod sa kompetisyon kondili tungod kay maoy gipangita sa katawhang bumabasa sukad pa sa pagkahimugso niini. Ug dungan sa pagtubo sa Banat News daghan kining mga pagsulay nga naagian sama sa mga pagsuway pagtuok sa kagawasan niini nga makapadayag sa kamatuoran bahin sa mga kahiwian ug kasaypanan sa pipila ka indibidwal.

Apan pabiling lig-on ang Banat News sa gibarogan niini ug dili kanus-a man moyukbo niadtong mga tawo o institusyong buot pugngan ang kagawasan sa pagbalita sa kamatuoran.