Unsay epekto kun way marriage license ang kaminyoon

Ang Marriage License usa sa mga formal nga requisites sa kaminyuon. Sa ato pa dili mamahimong magpakasal ang usa ka babaye ug lalaki kun way Marriage License nga ilang pagakuhaon gikan sa Civil Registrar. Apan adunay ubang magtiayon nga mo-shortcut sa proseso. Unsay epekto kun ang magtiayon magpakasal nga way Marriage License? Kana nga pangutana ang atong tukion karon.

“Dear Atty. Divine,

Una sa tanan magpasalamat ko sa imong libre nga paghatag kanamo og mga legal nga tambag. Aduna koy ipangutana kanimo Atty. labot sa akong kaminyuon. Nagpakasal mi sa akong bana niadtong 1990 ug aduna mi duha ka anak. Usa ka OFW ang akong bana ug human sa among panagtipon sud sa napulo (10) ka tuig nagbuwag mi ug nagduda ko nga aduna siyay laing babaye. Atty. gikasal mi sa akong bana nga way gisumiter nga rekisitos sama sa marriage license kay suod man sa among pamilya ang nagkasal namo ug di lang ko mosulti kun kinsay nagkasal namo atty. pero ang akong pangutana mamahimo bang ma-question ang validity sa among kaminyuon? Unsay angay nako nga buhaton atty?

Chona”

Dear Chona,

Usa sa labing importante nga rekisitos kUn ang usa ka babaye ug lalaki magpakasal mao kining Marriage License basi sa nalatid sa Article 3 par. 2 sa atong Family Code. Ang epekto niini kun ang kasal gipahigayon nga way Marriage License mamahimong void ab initio ang maong kasal or dili balido ang maong kaminyuon basi sa Art.4 sa Family Code. Kalabot sa imong kaminyuon kun wa mo makatuman sa maong rekisitos mamahimo kang mopasaka og Petition sa Korte aron madeklarar niini nga void ang imong kaminyuon kay dili man automatic ang pagdeklarar niini kay ang Korte lang ang makaputol sa atong kaminyuon. Apan kun aduna pay chance nga ma-save ang inyong kaminyuon mas maayo nga imo unang suwayan ang pagsalbar sa inyong kaminyuon tungod ug alang sa inyong mga anak. Apan kun sa imong tan-aw wa na gyud kay mahimo niini, mamahimo ka nga moadto og abogado aron maoy moandam sa imong Petition ngadto sa Korte. Daghang Salamat and God Bless.

Atty. Divine

Adunay kaminyuon nga exempted sa pagsumiter og Marriage License nga nalatid sa Articles 27, 28, 31, 32, 33 ug 34 sa Family Code. Usa sa exempted niini kadtong marriages tali sa mga muslims ug kadtong mga magpakasal nga naglive-in na kun nagpuyo na sud sa lima ka tuig di na sila kinahanglan nga mopresentar pa og Marriage License apan kinahanglan nga mo-execute sila of Affidavit kalabot niini.

Kun aduna moy pangutana, ipadala lang sa Legal Corner sa Banat News or email sa [email protected]