Ang salapi anaa sa umahan

Gustong momugna og bag-ong henerasyon nga mga mag-uuma si Kongresista Pablo John Garcia kun ugaling mapili siya nga gobernador sa lalawigan sa Sugbo sa umaabot nga bugnong lugaynon.

Ang maong laraw iyang himoon human niya makit-i nga ang mga mag-uuma nagkatiguwang busa gusto niyang agnihon ang bag-ong henerasyon sa pag-uma pinaagi sa paghatag og suporta sa sektor sa agrikultura.

Ang kongresista nakamatikod nga ang kadaghanan sa mga mag-uuma anaa na sa 65 ang pangidaron ug pataas hinungdan nga sa ikatulong distrito sa lalawigan sa Sugbo iyang gitanyag ang scholarship program alang niadtong gustong mokuha og kursong agriculture ug gikinahanglan nga ang maong programa mapadayon sa lalawigan sa Sugbo.

Ang nahuna-hunaan sa kongresista maayo ug angayan gayong suportahan tungod kay ang mga batan-on o bag-ong henerasyon karon nawagtangan na og gana sa pag-uma kay mahadlok nga mangitom sa kainit sa adlaw nga modapat sa ilang panit sa pagtikad sa ilang umahan.

Ang pagkahilis sa interest sa mga bag-ong tubo sa agrikultura makita nato sa nagkahilis nga gidaghanon sa mga tunghaan mahitungod sa pag-uma. Sa nasud gamay na lang ang gustong mag-uma.

Gani ang nasudnong kagamhanan wala na mohatag og igong pagtagad sa sektor sa agrikultura sulod sa taas nang katuigan ug ang ubang mga kongresista mihatag og prioridad sa ilang pork barel ngadto sa mga inprastraktura kay sa agrikultura.

Ang mga yutang agrikultural sa kabukiran gipanghimo nang commercial, industrial ug residential. Sa tanang kongresista sa lalawigan sa Sugbo murag si Kongresista Pablo John Garcia lang ang mibotang og premium sa sektor sa agrikultura.   

Ang gobyerno kinahanglan gayod nga mopalambo sa sektor sa agrikultura kun gusto man niining masulbad ang suliran sa kagutom ug kawad-on.

Kinahanglan nga iya kining suportahan ug palig-onon ina kay kalimtan ug abandonahon. Kun mapadayon ang laraw ni Kongresista Pablo John Garcia usa kini ka maayong timailhan sa dugang pa unyang paglambo sa kahimtang sa mga mag-uuma sa lalawigan sa Sugbo.

Ang Dios Miingon