EDITORIAL - Ang disgrasya di hibaw-an

Ang kapalaran sa kinabuhi sa tawo dinhi sa yuta wa gyuy laing nasayud gawas sa Magbubuhat nga maoy gamhanan sa tanan.

Siya ang tag-iya sa atong kinabuhi, busa Siya ra usab ang nasayud unsang tuiga ug orasa Niya kini bawion.

Busa ang mahimo sa tawo mao ra gyud ang panghinaot nga kun nakadangat ta karon, magpasalamat kita Kaniya, ug kun padangaton pa kita sa dugang pang katuigan, aw si kinsa pa bay laing nagbuot niini gawas sa atong Magbubuhat nga mao ang Dios.

Sama kang Kalihim Jesse Robredo, gikan siya nga mipalanog og mensahe sa dakong kombensyon sa mga CIS volunteer sa CICC sa dakbayan sa Sugbo dayon misakay siya og pribadong abyon pauli  sa Manila sa miaging Sabado dihang nahagsa sila sa kadagatan sa Masbate.

Sa pagsuwat niini wa pa hikit-i si Robredo uban ang duha ka piloto sa abyon nga ilang gisakyan.

Kun maluwas man ugaling sila sa maong disgrasya, aw angay silang magpasalamat sa Dios, ug kun ugaling mapakyas ang gilaumang kaluwasan sa ilang kinabuhi, angay dawaton ang tanan.

Ang usa ka tawo nga may dakong respeto sa Dios kaniadto mao si Job, gipuo sa Dios ang iyang 10 ka anak sa usa ka pamilok, gipatay sa Dios ang linibo niya ka mga baka sa usa ka pamilok, gipahubagan sa Dios ang iyang lawas gikan sa ulo hangtod sa lapa-lapa, unya gihagit siya sa iyang asawa kun magpadayon pa siya og simba sa Dios.

Unsay gitubag ni Job, “hubo akong migawas sa tiyan sa akong inahan, hubo usab akong mopauli sa yuta, kay gikan ako sa abog ug sa abog usab ako mopauli”. Walay nabati gikan sa baba ni Job nga nagmahay sa gibuhat sa Dios kaniya.

Baya pa ba sa kadaghanan karon, nga kun mamatay moingon dayon nga “pagbuot sa Dios” unya kun masalbar sa disgrasya tua magpasalamat sa di Dios. Kinsa mang Diosa malipay niana.