BANAT Editorial - Ang civil disobedience nga ilusad sa Katoliko

Nag-anam ka kulbahinam ang eksena sa nasud karon niining isyu bahin sa RH Bill kay sa higayong maaprobahan kini ug ikalusad sa mga Katoliko ang civil disobedience, mohugpa ang hilabihang kagubot ug kaguliyang sa nasud nga lisud kaayong masulbad.

Kay sa higayong pangunahan sa mga kaparian ang kampanya nga di na pabuhison ang tanang Katoliko, paralisado ang tanang kalihokan sa gobiyerno.

Gikan sa paghunong sa mga proyekto, ngadto sa pagka-wa nay ikasuhol sa mga trabahante sa gobiyerno busa sama sa kilat mosawom ang ekonomiya sa nasud.

Ang Katoliko sa nasud anaa sa 85 milyones ang populasyon niini ug kun ang mga magbubuhis niini ibutang ta lang nga 50 milyones, aw ang mahitabo ang taga BIR maghinuktok na lang ug wa nay trabahoon kay   wa na may mamuhis ug labaw sa tanan wa nay ika-suhol ang gobiyerno kanila.

Kun wa nay ikasuhol ang gobiyerno sa mga trabahante niini, kuyaw kaayo kun maghuramentado ang mga sundawo nga kun  ugaling kini mahitabo lisud na kaayo kapugngan ang kaguliyang ug kagubot.

Kaniadto ang mga komunistang rebelde sama sa NPA kun maoy mohulga og civil disobedience di man mosaler kay pila ra man sila kabuok.

Apan kining gibahad karon sa Katoliko nga pangunahan mismo sa Catholic Bishop Conference of the Philippines(CBCP) kuyaw kining butanga kay anhi mosukarap sa hingpit ang ekonomiya sa Pilipinas.

Kini tungod kay ang mga dagkong negosyante dinhi sa nasud mga Katoliko, ug tungod kay di na sila mobuhis, ang mahitabo kagitan sa kuwarta ang panudlanan sa kagamhanan.

Mahitabo gayud kini sumala ni Dr. Rene Josef Bullicer kinsa maoy coordinator sa CBCP tungod kay daan na kining giplano sa mga dagkong Obispo ug kaparian sa nasud.

Nasayud na ang tanan nga sa usa ka lang ka sinyas sa mga kaparian, tanang mga Katoliko andam sa pagtuman niini busa nag-atubang karon ang nasud sa usa ka dakong hulga alang sa hingpit nga paglukapa sa ekonomiya niini gawas lamang kun may mahimo ang gobiyerno sa paghilot niining isyu sa RH Bill.