Di kasinahan ang nahimutangan karon ni Senador Tito Sotto. Human nasakpan nga nangopya ug di lang usa, di lang duha, kun dili lima gyud ka web logs ug usa ka briefing paper, nangugat pa gyud pagpanghimakak sa makauuwaw niyang atraso. Ambot diin na sab kopyaha ang taphaw niyang depensa: Naatol lang kuno nga managsama ang ilang tinubdan sa usa sa bloggers nga namasangil nga nangopya siya. Nakapasamot sa kaapiki ni Sotto mao ang pag-angkon sa mga kawani sa iyang buhatan nga tinuod nga nangopya sila. Apan sama sa ilang amo, may taphaw sab silang depensa (ambot diin sab kaha kopyaha): Ang blogs kabahin kuno sa public domain busa gawasnon si bisan kinsa nga mangopya.
* * *
Ang chief of staff ni Sotto, si Atty. Hector Villacorta, nikumpisal nga way kasayuran ang senador sa pagpangopya nga gihimo sa iyang mga kawani. Busa, nilantugi siya, di angay’ng basulon si Sotto sa panghitabo nga wa siyay kalibotan. Nitataw si Villacorta nga way labot si Sotto kun may kalapasan mang nahimo ang iyang mga kawani. Si Villacorta, sama sa iyang amo, dakong sayop. Responsibilidad ni Sotto ang tanan niyang gipanulti sa hawanan sa Senado. Iyang responsibilidad ang pagpangopya sa iyang mga kawani sa di lang usa, di lang duha, kun dili lima gyud ka blogs ug usa ka briefing paper. Kun mokumpisal nga wa siyang kahibawo diin gikan ang iyang mga gipanulti, mas dako ang iyang tulubagon sa katawhang Pilipinhon.
* * *
Si Sarah Pope, usa sa bloggers nga gikopyahan ni Sotto, nipasangil nga pagpangawat ang gihimo ni Sotto. Human gipanghimakak ni Sotto ang pasangil, gitawag niya ang senador nga bakakon nga kawatan.
May laing reklamo si Sarah: Ang tumong sa iyang blog mao ang pag-edukar sa kababayen-an sa mga kadaot sa ilang paggamit sa pills; apan di niya dasonan ang pagsuway ni Sotto sa paghikaw sa kababayen-an sa katungod sa pagpili unsay labing maayo nga paagi sa pagplano sa pamilya.
* * *
Bisan sa iyang paghilak ug pag-angkon nga ang iyang pagsupak sa Reproductive Health (RH) bill nanukad sa kamatayon sa iyang anak nga lalaki, naputos na ron sa bugalbugal si Sotto. May mga nangangkon nga andam na si Sotto nga mangayo og pasaylo sa nabisto niyang pangopya, apan nangita pa siya og kakopyahan sa pagpangayo og pasaylo. May mga nangangkon sab nga nakadungog silang Sotto nga nikumpisal nga ang iyang speechwriters pulos nagtrabaho niadto alang ni Manny V. Pangilinan, ang inilang negosyante kansang diskurso atubangan sa mga gradwado sa Ateneo University nabisto sab nga kinopya.
Sa gusto o dili ni Sotto, bugalbugal na lay nahibilin niyang lusot: Ang pagkumpisal nga nidiskurso siya sa Senado di isip senador kun dili isip komedyante nga gusto lang mopahuwas sa tensiyon sa RH.
* * *
Email: leo_lastimosa@abs-cbn.com