Salamat ninyo ha?

Pasalamatan nako ang akong suod nga higala, usa ka kawani sa Cebu City government, kay siya ang mipahibalo kanako nga dunay caretaker sa Cebu City zoo nga napaakan og bitin nga Cobra adtong Martes sa hapon.

Kini maoy rason nga sa mga reporters sa newspapers dinhi sa Sugbo, ako ra’y nakasuwat niadtong maong balita nga migawas pagka-Miyerkules. Salamat usab kaayo ni kanhi Konsehal Sylvan “Jack” Jakosalem ug Gobernador Gwen Garcia.

Pagkabasa ni Jack sa akong balita sa The Freeman, misirit siya pag-adto sa Cebu City Medical Center ug mitan-aw sa kahimtang sa napaakan sa bitin. Dihang dunay kawani sa CCMC nga mitug-an nga ang Camiguin dunay stock sa anti-venom vaccine, milihok dayon si Jack.

Gikontak ni Jack ang gobernador ug maoy gipahangyo ni Camiguin Gov. Jurdin Jesus Romualdo nga pagamiton kita og anti-venom vaccines. Nagtipig man sila sa Camiguin og anti-venom vaccine kay daghang mapaakan og bitin sa ilang dapit.

Wala makabalibad ang gobernador sa Camiguin nga gihangyo ni Gwen nga mogamit ta sa ilang anti-venom vaccines kay ang tanang ospital sa Sugbo wala niining maong tambal nga gamiton para sa mapaakan og mga halas.

Apan kun wala pa si Jack nga maoy mikontak sa higala niya nga si Capt. Jessup Bahenting nga tag-iya og light planes, tingali bisan og misugot pa ang gobernador sa Camiguin apan dili gihapon madali pag-abot dinhi ang vaccines.

Wala usab makabalibad si Capt. Bahenting nga gamiton ang iyang plane sa pagkuha sa vaccines didto sa Camiguin nga walay bayad. Sa laktud, na-injection gayud ang anti-venom vaccines ngadto ni Ronald “Ronron” Aventurado nga wala pa molapas ang 24 oras.

Kun wala pa magpagamit sa iyang plane si Capt. Bahenting, tingali molapas na lang ang 24 oras gikan nga napaakan sa bitin si Aventurado ug posible nga mamilegro ang iyang kinabuhi.

Salamat kaayo kay tungod sa pagtinabangay, naluwas ang usa ka kinabuhi.

* * *

Angay ba gud nato nga basulon ug panghimarauton ang bitin nga Cobra nga mipaak ni Aventurado? Ang uban gud miingon nga maayo na lang patyon ang maong bitin kay mamaak man og tawo. Apan lahi ang baruganan ni Konsehal Edgardo Labella, kinsa miingon nga sa iyang farm didto sa Bohol, dunay daghang bitin. Wala lang nila hilabti kay mahinungdanon man usab ang bitin nga anaa sa atong palibut.

Una, ang mga bitin manakop ug mokaon sa mga ilaga ug ubang insekto nga maghatag lang og dangan sa atong palibut. Ang bitin anha ra gayud sila mopuyo sa lasang kon kakahuyan.

Apan unsaon, dunay uban nga mipuril sa atong kakahoyan kay gitukoran og kabalayan. Mao kini ang rason nga ang mga bitin nanaug na ug nagtago-tago sa mga dapit nga ilang katagoan. Usahay sa tanto nila nga pagpangita og katagoan, moabut sila sa atong palibut.