EDITORYAL - Santo Papa ok sa condom apan pari di ok niini

Di diay kaayo mabalaka ang tawo kun mogamit og condom kay may kakampi kini nga mao ang Santo Papa sa Roma.

Kay kun mga pari dinhi sa nasud ang konsultahon higpit nilang gidili ang condom.

 Tungod kay gawas nga kabahin na kuno kini sa krimen nga abortion,(ambot lisud kaayong sabton kun unsay bata nga mahilog nga unta di man ka kaporma og bata kun mag-condom ka) makapadasig pa kuno sa tanang tawo nga di minyo pagkomiter og immoral nga buhat. Mao man gani nga kutob sa mga magbabalaod nga mibotar sa RH Bill, di pabotaran sa tanang Katoliko unya sa election.

 Kay sa RH Bill gud, nagmandar man kini nga gahinan sa gobiyerno og minilyon ka pesos matag tuig ang ipamalit og condom ug uban pang matang sa kontraseptibo aron i-supply   libre ngadto sa mga magtiayon.

Ang tumong sa kagamhanan niini nga dili kaayo magpusot-pusot ang anak sa magtiayon o kaha makapugong sa paghimo og bata.

Apan gisupak kini sa mga pari tungod kay usa sa mga hinungdan mao nga nakadawat og dagkong suborno ang mga magbabalaod gikan sa mga tigpabrika og condom ug uban pang matang sa kontraseptibo.

Kay kun mabalaod na ang RH Bill sigurado man gyud nga ang mga kompaniya sa condom ug ubang kontraseptibo mao naman unya’y mahimong supplier niini dinhi sa nasud busa moburot sila sa pagka-kuwartahan.

Apan usa ka dakong opisyal sa NEDA nga si Temogen Arellano atol sa Kapihan sa PIA mitug-an nga okey ra man diay ang Santo Papa niining condom nga ipagamit sa katawhan.

Si Dr. Chona Lola sa Cebu City Health Dept. miangkon usab nga ang linibo ka mga commercial sex worker ning dakbayan gisuplayan nila og condom nga libre. 

Wala usab niya isulti kun tagpila ka condom ang ilang ipanghatag matag babaye apan gitino niya nga mao kini lig-on nga proteksyon sa maong mga babaye batok sa AIDS nga malagmit dala sa ilang mga customer nga mao usab diay kini ang gikampanya sa Santo Papa sa Roma sumala ni Arellano.