Di kabasol si kanhi presidente Gloria Arroyo sa katawhan. Nga bugnaw og reaksiyon sa mga awhag nga angay siyang hatagan og simpatiya tungod sa nakita sa iyang mga doktor nga kahigayonan sa kalit niya nga kamatayon. Kay kadaghan na mangangkon ang kampo ni Arroyo nga himatyon siya. Apan matag higayon nga makapabor, nikiat si Arroyo ug wa pakita og bisan unsang timaan sa pagkaluya.
Si Dr. Roberto Anastacio sa Makati Medical Center (MMC) nipahibawo nga nadiskaril ang titanium sa spine ni Arroyo. Nga gibutang aron kaabagan ang gabok nang mga bukog sa iyang liog. Ang babag sa ugat ni Arroyo maoy labing seryusong hulga sa iyang kinabuhi.
* * *
Ang pagsubay sa kasaysayan sa kahimtang sa panglawas ni Arroyo makapasabot nimo sa kakuwang og simpatiya sa publiko. Dihang nag-ung-ong nang mga kasong plunder ug naluwatan nang hold departure order batok ni Arroyo, nikalit lang siya og petisyon sa Korte Suprema nga kinahanglan siyang mogawas kay himatyon na ug mga doktor lang sa ubang kanasuran ang makaayo niya.
Salamat sa pakigkonsabo ni kanhi chief justice Renato Corona diriyot gyud makalayas si Arroyo agi sa Ninoy Aquino International Airport (NAIA). Maayo na lang nga naapsan sa pagpasaka sa Commission on Elections (Comelec) og kasong electoral sabotage tungod sa lapas nga tikas sa piniliay pagka senador niadtong 2007.
* * *
Nituo si Corona ug ubang mga mahistrado sa labaw’ng hukmanan nga himatyon si Arroyo bisan nilikoy ang iyang petisyon—sa usa ka bahin nangangkon nga himatyon, apan sa pikas nga bahin nananghid sab nga motambong og mga tigom sa nagkalainlaing kanasuran.
Tuod man, dihang gipatawag sa Pasay City Regional Trial Court ang mga doktor ni Arroyo sa St. Luke’s Medical Center, dihang napriso nang ilang pasyente sa Veterans Memorial Medical Center (VMMC), niangkon sila nga di himatyon ang kanhi presidente ug nga takos ang mga doktor ug mga tambalanan sa Pilipinas sa pagtambal sa iyang sakit.
* * *
Wa katabang sa kawsa ni Arroyo ang kalit niyang pagkabaskog dihang gitugotan na sa korte nga makapiyansa. Niggawas siya sa tambalanan nga wa na magsakay og wheelchair, nga wa na gyud niya ibuwag sukad sa napakyas niyang paglayas sa NAIA sa niaging tuig.
Inay mopahuway sa iyang bay sa La Vista, Quezon City, nga maoy angay’ng buhaton sa usa ka masakiton, nitungas siya sa Tagaytay City ug nagpiyesta uban sa iyang mga dumadapig. Dihang giapura sa nagpakabana nga mga sektor ang Sandiganbayan pagluwat na og warrant of arrest sa kasong plunder batok niya, si Arroyo nibanhaw sa iyang pangangkon nga himatyon ug nagpa-ospital na sab.
Nabisto hinuon nga si Arroyo natuk-an ra diay sa gikaong bacon ug pakwan. Maong wa dayu’y nituo sa pagbanhaw sa karaang lusot sa titanium.
* * *
Email: leo_lastimosa@abs-cbn.com