Ayaw'g ligoy-ligoy

Kanindot aning lakang sa duha nato ka konsehal dinhi sa dakbayan nga pahimoan sa atong mga city engineers og sampling ang kabilya ug ang semento nga gigamit sa mga kontraktor sa lainlaing government projects.

Kun tumanon lang gayud sa mga sakop sa Department of Engineering and Public Works (DEPW) ang awhag nila ni Konsehal Roberto “Bob” Cabarrubias ug Konsehal Michael Ralota, nindot kaayo ang epekto.

Mao ni ang nakaayo kay si Cabarrubias usa ka engineer samtang si Ralota usa ka architect mao nga suheto sila niining maong lakang. Dili imposible nga daghan sa atong mga kontraktor ang mohimo og maniubra aron makaangkon og daku nga ganansya.

Imbis nga dagku ang kabilya nga gilatid sa specifications diha sa designs sa ilang proyekto, apan sa aktwal na nga pagtukod sa proyekto gagmay ang gamiton aron nga bobarato ang presyo.

Ang “mixing” usab sa semento, mahimo nga may pagka lasaw aron gamay ra ang semento nga magamit.

Kinahanglan nga ang inspection himoon sa kinalit nga paagi. Maayo lang lagi kun walay panagkunsabo sa mga kontraktor ug sa mga city engineer. Apan hagit kini kang City Engineer Kenneth Carmelita Enriquez.

Daku ko og pagsalig ni Enriquez nga magtinarong ni siya sa katungdanan kay siyaro og mangwarta pa ni siya nga si Kenneth man gani maoy giila nga labing datu sa tanang opisyal sa City Hall.

Ang iyang kabtangan nga naglakip sa mga building, yuta ug mga sakyanan mikantidad og dul-an sa usa ka gatus ka milyon. Mao na nga awhagon nako ka Engr. Kenneth nga trabaho g’yud tawon aron malimpyo sa binuang ang DEPW.

Si Kenneth karon maoy gidistino ni Mayor Michael Rama nga mangunay sa pagdumala sa Office of the Building Officials (OBO) nga gitahasan sa pagtan-aw sa pagtukod og mga building, ma-pribado man o iya sa kagamhanan.

* * *

Gikan adtong Enero hangtud karon, 14 na ka bata ang namatay tungod sa diarrhea kon “kalibanga.” Ang gidaghanon sa mga tawo, sagad mga bata, nga nakasinati og kalibanga miabot og kapin sa 2,000.

Apan matud ni Durinda Macasocol nga maoy assistant head sa City Epidemiology Statistics and Surveillance Unit sa City Health Department, nga bisan pa’g 14 na ang namatay sa kalibanga apan dili gihapon kini maisip nga alarming.

Ang kahugaw sa pagkaon ug mainom maoy sagad hinungdan sa kalibanga, ug usahay hepatitis-A.

Akong giawhag si Dra. Alma Corpin nga maoy pangulo sa Field Operations Section sa City Health nga paspasan niya pagsusi kining mga namaligya og pagkaon nga dili sigurado nga limpyo.

Giawhag nako si Dr. Corpin sa pagsusi nianang kan-anan nga anaa mahimutang daplin sa karsada sa Lapulapu Street kay sa iya lang dagway sa mao nga restaurant, mora’g dili maayo. Palihug lang dok.

Unya samtang nagsuwat ko niini nga lindog, dunay akong kauban nga miduol ug miingon nga ipaapil kining kan-anan nga dia duol sa Freeman nga anaa maninda ibabaw sa sapa.

Bitaw, maayo usab nga sugyot. Na hala, Dok Corpin apila na lang usab kining tindahan diri duol sa Freeman apan gabii ra man kini maninda. Paniid nako, mora’g nagluya-luya ang atong mga health inspectors sa paghimo og inspection.

Fight g’yud mo!