Dili ba maayo konsehal?

Ang naandan nga kaakohan sa mga Sugbuanon

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Nahimo na nga naandan nga kaakohan sa mga Sugbuanon ang pagpadala og hinabang sa mga dapit nga maigo sa wala damha nga katalagman sa pagpaluag sa gibati nga kalisod sa mga biktima nga nagpuyo niini.

Ang atong mga opisyal sa mga lokal nga kagamhanan, mga lainlaing sektor sa atong katilingban ug ang mga ordinaryong molupyo makighiusa kanunay sa pagpadangat og hinabang sa matag higayon nga adunay dapit dinhi sa nasud nga nakasinati og katalagman sama sa pagbaha, landslide ug uban pa.

Sa paghingan sa pipila ka mga dapit dinhi sa nasud nga nakasinati og katalagman nga gipadad-an og hinabang sa mga Sugboanon mao ang Guinsaogon, Leyte dihang midahili ang yuta ug daghan ang mga molupyo ang nahimong biktima.

Nahitabong pagbaha sa Luzon area dihang naigo sa bagyong Ondoy, pagbaha sa Cagayan de Oro ug dakbayan sa Iligan, nahitabong linog sa Negros, Iloilo ug uban pa.

Sa miaging pipila na ka adlaw nga nakalabay maoy nasinati sa tibuok bahin sa Luzon area ang hilabihan nga kakusog nga pagbunok sa ulan ug subli na usab kining gibahaan.

Ang pipila ka dapit sa kaulohan nakasinati usab og pagdahili sa yuta ug pagkaguba sa ilang mga taytayan nga maoy hinungdan sa hilabihan nga kalisod karon nga naangkon sa kahimtang sa mga molupyo.

Nunot sa subli na usab nga pag-igo sa maong katalagman sa maong lugar maoy gihimo karong lakang sa pipila ka pundok sa atong katilingban sa pagtigom og mga hinabang nga ihatag sa mga Sugboanon.

Ang atong mga lokal nga kagamhanan sama sa dakbayan sa Sugbo pinaagi sa giluwatan ni Mayor Michael Rama sa iyang pamahayag maoy iyang gipahibalo ang pagdala usab og hinabang ngadto sa mga molupyo sa maong lugar.

Si Gobernador Gwendolyn Garcia miluwat na usab og kasayuran labot sa paghatag na usab og hinabang sa mga molupyo sa kaulohan nga naglakip sa bugas ug pinansiyal nga hinabang sa kagamhanan sa lalawigan sa Sugbo. (Romeo T. Limpangog)