Sistema sa sports sa Phl

Kinahanglang dunay himuong lapad nga kausaban sa sistema sa natad sa paugnat sa kusog sa Pilipinas kung buot niining makapadala og mas dagko og tsansang makakuha og medalya sa prestihiyosong Olympics.

Nakita kini sa gihulagway sa mga balita nga ‘poor showing’ sa mga atleta sa Pilipinas nga mi-compete dili lang sa nagpadayon karong 2012 London Summer Olympics sanglit bisan sa South East Asian Games nga kaniadto dili mawala ang Pilipinas sa top 3 standings, karon naapsan na sa mga nasud sama sa Singapore, Malaysia, Indonesia ug Vietnam.

Dili siguro makatarunganong basulon ang mga atleta tungod kay kining mga bataa sama na lang sa atong pangbato unta sa London Olympics nga si Mark Anthony Barriga sa boxing, naggikan kini sa ordinaryong banay sa Davao.

Ang atong mga atleta tag-as og pangindahay nga unta sila maoy unang Filipino athlete nga makabitbit sa idlas kaayong Olympic gold medal sa Pilipinas, busa dili siguro angay nga sila basulon o dudahang wala maninguha. Sa habig sa gobiyerno, dunay pundo nga gitagana alang sa mga atleta apan naputos kini sa mga kontrobersiya sama sa kurapsyon tungod kay giingong wala magamit sa husto o wala gamita ang pundo alang sa gitaganang sport event aron mabansay ang atong mga atleta.

Sa kagamay sa budget allocations gikan sa panudlanan sa gobiyerno alang sa atong mga atleta, duna pa gihapoy mga pasangil nga kurapsyon maong dili gyud katingad-an kung ang atong mga atleta mangiwit sa duwa tungod kay kulang naman gyud sila sa tanan. Ang mga atleta magkinahanglan og sapot, training, kapuy-an, allowances, medical, maayong coaches, foreign trainings ug uban pa nga maoy gihimo sa ubang mga nasud nga naapil sa mga nasud nga kanunay makakuha og medalya sa Olympics.

Ang Philippine Sports Commission Act natukod pinasikad sa Republic Act 6847 nagmando nga kinahanglang dunay commission nga maoy mo-superbisa sa tanang mga sporting events, organisasyon ug mga kahugpongan sa natad sa sports aron gikan sa maong mga pundok makapangita, makapundo ug makasuporta og mga potensyal nga atleta alang sa kalamboan sa mga Filipino. Usa sa mga katuyoan sa katukoran sa maong komisyon mao ang paghimo og mga polisiya nga makagiya sa tanang amateur sports promotions development ilabi na ang mga grassroot programs.

 Lakip sa ilang function mao ang pagtukod kutob sa mahimo sa budget ug mga pasilidad sama sa mga sports complexes aron maka-host og mga sporting events dili lang locally lakip na ang mga international sporting events. Gani usa sa function sa PSC mao ang paghimo gyud og mga lakang maka-host ang Pilipinas sa Olympic games dinhi sa nasud sa labing daling panahon. Mura og imposible pa kini sulod sa 30 ka tuig gikan karon. Paghatag og hustong benepisyo alang sa mga atleta, sporting officials, organisasyon, mga referees ug uban pa aron mas molambo pa ang direksyon sa sports sa nasud.

Usa sa dakong problema sa sports sa Pilipinas mao ang politika sa sulod mismo sa matag sporting committee o commissions tungod sa nagkadaiyang personal nga interes sa mga “komisyoner” nga nagkupot niini. Ang negatibong resulta niining pamolitika sa sulod niining mga sports committees adto mahan-ok sa atong mga atleta tungod kay sila kanunay ang mapiit sa sitwasyon, daw kinahanglan pa nilang makigkombate sa dili maayong sitwasyon gawas pa sa pagpangandam nga maka-compete.

Ang kakulang sa Pilipinas nga makakuha bisan medalyang bronse sa London Summer Olympics dili angayang ibasol ngadto sa mga atleta ug bisan na sa gobiyerno kundili sa bulok nga sistemang nagpasulabi karon.