EDITORYAL - Ang balik probinsya program

Di sayop sa kagamhanan   ang paghingilin sa mga lalin nga mopuyo sa usa ka siyudad nga mahimo na hinuong risgo sa maong dapit ilabi na kun anha kini mamuyo sa daplin sa kasapaan o kaha daplin sa dagat.

Kay ang maong mga lugar delikado kaayo sa panahon nga may baha o kaha   sa kulyada   nga modagko ang bawod.

Mao kini ang nahitabo sa dakbayan sa Sugbo kansang mga eskuwater namuyo sa tampi sa sapa ug naghatag og dakong peligro sa ilang kinabuhi.

Samtang sa Talisay ang mga eskuwater anaa mopuyo sa lapyahan sa dagat ug sa panahon nga modagko ang bawod sila maoy unang rumbo niini busa makapalabad sa ulo sa mga nagdumala sa maong   lugar.

Busa si Mayor Mike Rama sa dakbayan sa Sugbo, napugos    sa pagpapahawa sa    mga molupyo gikan sa tampi sa Mahiga creek tungod sa ka-peligro sa ilang kinabuhi.

Maayo ang Cebu City kay may giandam nga relocation site sa mga eskuwater niini, busa wala lang papaulia sa ilang gigikanang mga lungsod ang maong mga eskuwater.

Sa Talisay nakahukom si Vice Mayor Alan Bucao nga papaulion ang mga nagpuyo sa daplin sa dagat nga way laing kadangpan, ngadto sa mga lugar nga ilang gigikanan.

Wa man untay problema sa namunoan sa Talisay kun ang mga molalin sa maong lugar gikan sa mga kalungsoran may kaugalingong yuta o kaha balay nga luwas sa peligro sa panahon nga may bagyo ug uban pang matang sa katalagman.

Ang tanang lugar dinhi sa Sugbo bukas ni kinsa mang tawo nga mopuyo niini apan kinahanglang anaa siya sa dapit nga di makahatag og problema sa nagdumala sa lugar.

Ang gikinahanglan sa namunoan dinhi mao ang mga molupyo nga di burokento og pangutok kundi   matinumanon sa balaod.

Ang mayor sa usa ka siyudad o kaha lungsod sama ra sa usa ka amahan sa panimalay nga kun aduna may buot motipon sa iyang panimalay kinahanglang buotan  ug di badlungon kay   ang badlungon dali ra kaayong hinginlan kay matawag man kini nga way ayo. Di ba?