BANAT EDITORIAL - Gidaghanon sa nangamatay'ng inahan misaka

Ang United Nations mibati og kabalaka sa pagsaka sa gidaghanon sa nangamatay’ng inahan base sa survey sa NSO sa tuig 20ll kansang resulta migawas sa miaging Hunyo niining tuiga. Maoy hinungdan nga nagkanayon ang UN nga gawas lang kun ma-budgetan sa kagamhanan ang mga kontraseptibo nga ihatag nga libre ngadto sa mga magtiayon, mag-anam kaitus ang kababayen-ang Filipino sa umaabot nga mga adlaw.

Kay base sa NSO survey, ang mga babayeng palaanak mao kadtong mga kabus ug way hustong edukasyon sa eskuylahan. Sa ilang pagkapalaanak , nahimutang sa dakong risgo ang ilang kinabuhi, tungod sa pagpunay og anak mag-anam kahaguka ang mga unod ug tanang bahin sa lawas sa babaye hinungdan nga dali kaayong dakpon sa nagkalainlaing sakit nga makamatay.

Busa kasagaran sa mga babaye mas unang mamatay kay sa lalaki tungod kay ang lawas sa lalaki di kaayo hago itandi sa babayeng magpunay og panganak.

Pero sa nasuta sa kadaghanan niadtong rally batok sa RH Bill daghan kaayong kababayen-an nga pabor nga magpatuyang sila sa pagpanganak busa way kapuslanan ang kabalaka nga gipadayag sa UN.

Kumo kay mas pabor ang mga kababayen-ang Filipino nga magpatuyang sa pagpanganak, wa na kinahanglana ang RH Bill, kay wa magkinahanglan ang mga Filipino og kontraseptibo nga libre.

Wa magkinahanglan ang mga Filipino og libre nga sustansya sa inahan nga magsabak ug sustansya sa bata nga gisabak niini. Kay ang budget unta alang niini anha man maggikan sa balaod bahin sa reproductive health (RH) diin iplastar kun pilay budget matag tuig alang sa kondom, ug uban pang matang sa kontraseptibo nga libre ug way bayad alang sa pagpagintang sa pagpanganak sa usa    ka inahan, niadtong gustong may gap ang pagpanganak. Apan sa gustong magpusot-pusot ang pagpanganak matag tuig wa sa maong balaod ang pagpugong   niini.

Kun mabalaod unta ang RH bill may budget na matag tuig ang sustansya alang sa inahan nga magsabak ug sa gisabak niini nga ang tanan ihatag nga libre sa goberno kanila. Apan sama karon nga way balaod bahin niini busa way budget ang goberno sa maong mga butang nga mao usab ang gikinahanglan sa kadaghanang kababayen-an. Busa mas maayo pa og biyaan nang isyuha ug ang budgetan mao ang pagpatukod og balay paanakan nga binayran buwahan to makasapi pa ang goberno. Di ba?