Hapon kadto sa dihang nakigkita kanako si Rommel Bacuajon’ akong classmate kaniadto sa College Seminary. Iya kong gidapit nga magkape sa may Coffee Dream. Daghan mi og gipanaghisgutan. Sa kalit lang dunay usa ka parokyano ang niduol ug nangutana: “Nag-unsa ka man dinhi? Naglaag-laag lagi ka?” Sa yano ug daklit nga tubag ako siyang giingnan: “Nia kay nagsuroy-suroy. Unya nilakaw siya. Laing hugpong sa mga parokyano ang nahiagi sa among nahimutangan sila nangutana kanako: “Musta naman ka?” Ako silang giingnan: “Nia ulitawo gihapon...” Ug nangatawa sila. Dayon namahawa kay dunay gipalit sa unahan. Nibalik ang naunang parokyano ug nangutana: “Wala pa lagi ka mouli???!” Ako lang siyang gitan-aw. Maayo pa ang laing hugpong kay nangumosta apan kini siya? Mora’g sekreta sa NBI.
Dili man ko supak nga ang pari alang sa tanan apan hinaut pud unta nga sabton nga ang pari bisan alang sa tanan dunay kaugalingong privacy. Matag lihok tan-awon ug hatagan og kahulogan. Matag lakaw niya ipangutana. Kay ngano man? 24 oras ba gud ang misa o kinahanglan ba nimong magsotana aron ka ilhon nga si Padre Amaro? Hinuon a habit cannot make a monk. Human sa maong talan-awon ako milakaw ug namalandong. Gisuroy ang bibo ug nagdula didto. I just want to be myself matud ko bahala nag unsay ikasulti sa mga tawo. Total, wala man ko’y gihimong dili maayo ug kun duna man ako na kanang problema ug dili na ila. Samtang gipalupad ko ang akong hunahuna kun unsa diay ka mat-an ang atong isigkaingon ngadto sa ilang isigkaingon nahinumdom ko sa pahimangno ug pagdapit aron mamahimong molihok taliwala sa kabati sa panahon: “Per Quanto Brutto Sia Il Tempo Domani, Preferisco Fare Qualcosa Che Stare a Casa!’ (Bisan unsa kabati sa panahon ugma, mas pilion ko pa nga dunay himoon kaysa magpabilin sa balay!)