Ang secretary to the mayor nga si Belinda Navascues mihulagway nga pamolitika ang nabulgar nga pagpahimulos niya sa medical assistance program sa dakbayan.
Matud ni Navascues nga bisan ang mga kawani sa City Hall mamahimo nga makapahimulos sa CHAMP kon City Hospitalization Assistance and Medicine Program.
Sumala niya dunay pagtugot ni Mayor Michael Rama ang pagbayad sa CHAMP og kapin sa P145 mil didto sa Chong Hua Hospital alang sa iyang anak nga na-admit niadtong Abril sa miaging tuig.
Ang Letter of Authority nagpakita nga si Navascues maoy mipirma niini sa ngalan sa mayor. Kinsa may nag-request?
Ingon ba niini ang matang sa pamunoan sa dakbayan sa pagkakaron nga ang mga suod sa mayor mao nala’y magbuot unsaon nila paggasto ang kwarta sa mga magbubuhis?
Kun may kaikog pa si Navascues sa mga kabus nga mao untay tag-iya sa pundo dili siya magluma-luma og patambal sa iyang anak sa pribadong ospital ug wala diay siya’y ikabayad.
O bien iya untang gilimitahan ang paggamit sa kwarta sa kantidad sama sa labing dako nga madawat sa mga ordinaryong kabus.
Dili ba P25 mil ra man ang labing dako nga hinabang nga madawat sa mga kabus ubos sa CHAMP, nganong miabot man og kapin sa P145 mil ang nakuha ni Navascues?
Kini tungod kay mura sila og nakatag-iya sa pundo sa katawhan, sila ray nagbuot pilay ilang kuhaon samtang daghan intawon nga mga tinud-anay nga beneficiary ang nagkapangko-pangko og pangayo og hinabang bisan asa tungod kay di hapit hatagan nila sa City Hall.
Pagbaton sab intawon mo og delicadeza o ba kaha pamalit mo og uwaw kay sa akong tan-aw dili man mo maantigo mauwaw.
Pasanginlan pa ang politika, unsa man intawoy labot sa politika sa imong pagpahimulos sa kwarta sa mga kabus?
Sigun sa kasayuran nga akong nahipos dili lang diay si Navascues maoy nihimo niini. Duna pay laing sinaligan ni Rama nga mao say gibuhat.
Hain naman ang tul-iron ang hiwi niini ron? Angayang ipakita ni Rama nga sinsiro siya sa iyang mga pulong.
Aron matul-id ang klarong hiwi nga pamaagi sa medical assistance program sa City Hall dili kaha maayo mayor og imong taktakon sa pwesto nang imong mga mapahimuslanon nga mga hinanib? Way luna sa panggobyerno ang mga tawong mapahimuslanon, kana kun tarong pud ang namunoan. Tarong ka ba Mayor?
* * *