EDITORYAL- Pilipinas mao pay pagsugod sa paghipos sa basura

Dugay pa makakat-on ang mga Filipino sa nakat-onan sa ubang nasud bahin sa hustong paghipos sa basura.

Hinuon mas arang-arang kay nagsugod na ang mga Filipino og tikang sa ang-ang aron mosangko ngadto sa hustong edukasyon bahin sa pag-atiman sa basura.

Sa New Zealand, nakagraduwar na ang katawhan didto bahin sa inantigo nilang paghipos sa basura.

Kay ang ilang gobiyerno didto wa na mamalit og trak sa basura kay sila mismong katawhan mao nay mohatud sa ilang basura ngadto sa basurahan sa kagamhanan.

Dinhi sa ato, nagkagidlay na ang gobiyerno og pinalitay og trak sa basura, unya ang mga tawo molabay lang gihapon sa ilang basura sa kanal, o kaha bisan asa, nga nagpasabot lang sa kabarumbado sa uban nga di gustong mokuyog sa hustong desiplina sa kaugalingon aron makakat-on sa tinuoray’ng kinaiya sa tarong nga lungsoranon.

Maoy hinungdan nga kun itandi ang  atong nasud sa New Zealand ug uban pang nasud nga matawag nga "developed" o naugmad na sa hingpit, tingale moihap pa kita og laing centenario o usa ka gatos ka tuig una kita makakat-on sa pagdesiplina sa atong kaugalingon.

Hinuon  sa maong mga panahon pulos na bag-ong henerasyon ug ang kabukogan sa mga katawhan karong panahona mahimo nang yuta.

Apan ambot kaha tungod sa kadaghang nauyamot karon nga mga kabataang gipanganak sa mga ginikanan nga way pangandam, ug nahimong libudsuroy sa kadalanan , busa way hustong edukasyon ug way hustong kinaiya pagbaton og hustong desiplina aron mahimong tinuod nga lungsoranon.

Kay samtang nagtubo ang populasyon sa nasud labing gisugnoran ang kabus nga pangutok   sa kadaghanan sa edukasyon nga magpadasig kanila nga di angay magpugong-pugong   sa pagpanganak.

Busa bisan pa kun molanat pa og laing centenario ang edad sa kalibotan    matataw pa nato nga ang kahimtang sa kinaiya sa mga Filipino karong panahona mao lang gihapon sa umaabot nga mga tuig tungod kay gumikan sa way bugto nga pagpanganak, mosamot ang kalisud sa panginabuhi ug mosamot kadaghan ang kuwang sa hustong edukasyon busa mosamot kadaghan  ang badlungon ug way pagpakabana bahin sa hustong paghipos sa basura. Di ba?