Matud pa, “LAUGHTER IS THE BEST MEDICINE”. Dili lang kay kini usa ka panultihon. Gikompirmar kini sa atong mga sekolohista ug sekayatrista, nga daku usab ang matabang niani alang sa atong panglawas, isip nga epektibong naturotherapy o natural nga alibyo sa atong mga gipamati nga kahasol.
Kun ang pagtoo o positibong paghunahuna makaayo sa balatian o sakit, mao usab ang katawa. Ang pahiyum gani makatabang nato nga mopabatan-on sa dagway ug pagbati. Unsa na kaha nga ang katawa,mopawagtang usab sa gibating kasakit (pain or sick). Epektibo kaayo ning makapaalibyo sa nerbyos. Ibalanse niini ang nagkayamukat nga reflex o hormonal stress. Sagad sa tambal ipainom, para lamang sa pagpakalma sa depresyon apan ang katawa, maoy mopaayo sa grabeng stress o nerbyos. Busa himoang gawi o lifestyle ang mokatawa permi. Wa pay gasto, disiplina ra ang puhunan.
Aron di kita masaypan nga nayabag na, sa sige’g katawa sa kaugalingon, buhata lang sa balay o kwarto, nga magsud-ong nagkatawa diha sa salamin. Ingon sa nag-ehersisyo, nagpraktis mahimong artista nga komedyante.
Sa gawas, makighinabi o maminaw ka’g kataw-anang estorya. Pagbasa og comical nga libro o komiks. Naay daghang programa sa radio ug TV o salidang komedya nga mahimuot ka’g sige og katawa sa CD o DVD.
Buhata kini inubanan kanunay sa hustong pagkaon ug ehersisyo nga maglakaw, aron makabenepisyo gayud sa tinuoray nga kinabuhing malipayon.