Kun ang dagkong lungsod sa lalawigan angay himoong siyudad aron kahatagan og dugang mga mehoras, wa ba diay katungod ang mga dagkong sitio aron himoong barangay.
Ang mga tawong mobabag sa kauswagan sa usa ka lungsod ngadto sa pagka-siyudad mao ra kadtong mga hakog nga politiko kinsa gustong magpabilin nga di mouswag ang usa ka lugar ug ingon man ang mga nanagpuyo niini.
Sa kasaysayan sa upat ka lungsod ning lalawigan sa Sugbo nga gihimong siyudad, kumosta na ang mga molupyo sa maong mga lugar karon, di b a nabuhong sa dagkong mga kauswagan sa ilang lugar.
Unya di man tingale hikalimtan sa mga taga Sugbo kinsa toy mga politikong Sugboanon nga dakong supak nga mahimong siyudad ang maong mga lungsod gumikan lang sa kadawo nga matibhangan ang mga bahin nga kuwarta sa matag siyudad sa nasud nga eksistido na.
Buot lang ipasabot nga hakog ang maong mga politiko nga way laing gilantaw kundi ang pagpaburot sa ilang kaugalingon nga wa maglantaw nga ang mga tawo sa gagmay nga mga lugar nangandoy usab og kauswagan.
Sama ra usab niini ang mga nanagpuyo sa sitio Banawa -Englis, nga sakop sa Guadalupe.
Kun may mosupak man nga ibuwag ang maong mga lugar gikan sa Guadalupe aron mahimo kining barangay, way lain gawas niadtong mga hakog nga politiko nga di gustong makabaton og mga lider ang maong mga dapit aron maoy mopauswag niini.
Ang tarong nga lider sa usa ka lugar, kaantigo moplano nga aron mogaan ang iyang responsibilidad , ipatuman niya ang division of labor.
Busa sama sa Guadalupe , nga dako na kaayo ang di hakog nga lider mohukom nga iyang ipamahin ang iyang responsibilidad ngadto sa uban niyang konstituwente aron mogaan ang iyang obligasyon ug maatiman pag-ayo ang ubang lugar nga di halos niya maatiman.
Gawas kung hakog siya, ang anaa sa iyang hunahuna mao ang pag-solo niining tanan ug wa maghunahuna nga ipamahin ang iyang responsibilidad sa pagdumala niini kay wa siyay gusto nga may laing mga lider nga mobarug sa maong dapit gawas kaniya ug wa siyay laraw nga makabaton og dugang mehoras ang Banawa -Englis. Di ba?