Ang panakit sa abaga o likod

Kalagmitan magsugod kini, kun anaa kana sa pangedarong 40 pataas, sagad imo na kini mabati, ilabi na, anaa ka sa sobrang gibug-aton o tambok kaayo, mas masayo mo kini masinati.

Unya wa kay hago o mag-anad sa paglihok o wa poy ehersisyo nga gibuhat, aw mao kini ang pipila nga maoy nakaingon.

Unsa man gyu’y hinungdan niini? Matud pa sa pagpasabot sa mga doctor, tungod kini sa sobrang kapoypoy sa mga pinong kaugatan o panakit sa atong kaunoran. Mora’g may piang ang atong gipamati sa likod. Daghan kini’g mga hinungdang na pugos o nabug-atan ang ugat sa likod, kay lagi dili maayo ang pagkahiluna sa posisyon sa pagtulog ug kanang paglihok o pag-alsa sa sobra sa kapasidad o nagduko nga namuwersa. Ingon man ang arthritis nga inanay motumaw kun magkaedaran na.Unya, unsa may angay nga buhaton nato?

Ang mga mosunod maoy gisugyot:

 Ayaw palabi patambok. Kay sobra ra kabug-at ang tiyan nga permi mapwersa ang abaga.

 Kun mag-alsa, ayaw pagduko, ituy-od ang lawas, aron mabalanse ang kusog nga magamit.

Ayaw sab pagluko nga maghigda o magbitay sa unlan ang abaga. Iplastar ang likod nga nakadapat sa higdaanan.

Sa paglingkod, itarung nga nakadapat sa sandiganan ang likod, ayaw idungoy ang liog.

Kun maglakaw itisar ang lawas ayaw ihiko o pagbako sa linaktan, nga mora’g pahoy.

Mas makaaayo nga sa paglingkod o paghigda, may hapin nga kutson, aron dunay anatomical balance sa pagdapat sa posisyon sa lawas.

Mag-ehersisyo nga igo-igo lang aron maunat o malihok ang sistima sa kaugatan sa atong panglawas.