Salamat Sir Dodong ha?

Pwerteng lipaya sa mga kawani sa The Freeman ug Banat News atol sa ika-93 ka tuig nga kasaulogan sa pagkamugna sa The Freeman niadtong 1919. Ang tanan pulos nakadawat og maanindot nga gift gikan ni Dr. Jose R. Gullas, ang chairman of the board sa among kompaniya.

Si Sir Miguel Belmonte nga maoy president ug chief executive officer (CEO) sa among kompaniya modugang pa gani unta pero daghan ang miingon nga unya na lang ‘sab sa Pasko ang iya.

Salamat kaayo Sir Dodong Gullas sa imong gift. Mahalon nga relo ang akong nadawat. Ang uban gihatagan og libo-libo ka pesos nga kantidad sa gift check walay labot sa mga relo nga daw gihurot pagkompra sa baligyaanan.

Kapin gud mi sa 200 ka kawani ug kadaghanan mga relo ang gihatag aron nga dili malangan pag-report sa ilang tagsa-tagsa ka trabaho.

Kay gisul-ob man dayon nako ang maong relo, naglaway intawon ang mga snatchers sa Colon nga nagtan-aw. Kaila man sila nako mao nga igo na lang sa pagtutok sa akong relo. He! He! He!

* * *

Gusto na unta ko nga mohunong sa pagpanakop sa mga abusado nga drayber, apan ang kinaiya sa daghang drayber maoy nakapadasig usab kanako nga ipadayon ang nasugdan ko na nga kawsa. Nagdali ko kagahapon kay gidala nako sa doktor ang usa ka sakop sa akong pamilya, apan napikal ko sa drayber og PUJ nga nagbabag-babag sa agianan. Gipasiklapan nako ang daplin sa karsada, klaro kaayo nga “No Stopping” ang maong dapit.

Gihuwat nako nga makahuman pagsakay ang pasahero nga iyang gihunongan sa dili tukma nga dapit, apan didto na usab sa tabok sa karsada mihunong nga gidili gihapon ang paghunong.

Kay nagdali man lagi ko paingon sa doktor, igo na lang ko sa pagpanglingo-lingo ug sa hilom nakaingon ko nga dili pa gayud angay nga mopahuway ko sa pagdisiplina sa mga badlongon nga drayber.

Kun gidakop pa nako ang maong drayber, tabla ra nga mitrabaho siya kagahapon nga walay kinitaan kay ang multa sa iyang violation, mokabat man og P1,278.

Ang gihimo niya mao ang Disregarding Traffic Sign (DTS), naapil kini sa mga lagda ubos sa reckless driving.

Makalagot gayud kining mga drayber nga bisan og nasayud sila nga gidili ang paghunong sa usa ka dapit, ibaliwala ra ang traffic sign. Unya kun madakpan na pwerte nga makahangyo.

* * *

Nalipay ko nga nakakita kagahapon sa usa ka sakyanan nga ang Vanity Plate nga PNP 111 gibutang ra niya ibabaw sa iyang orihinal nga plate number sa atubangan.

Akong gisaludohan ang maong motorista kay dili siya sama sa uban nga tag-iya og sakyanan nga ang PNP 111 maoy gitaptap o gihulip sa orihinal nga plate number. Usa kini ka sayup og madakpan sila sa ilang gihimo. Aw, mga datu man hinoon ang naghimo niini ug dili kaayo sakit alang kanila ang multa nga P5,000. Nganong maghinambog man gayud mo pagbutang-butang ana nga Vanity Plate? Aron ingon nga polis mo?

Bisan pa gani ang mga sakop gayud sa PNP wala tuguti nga mag butang niini nga itaptap nila sa orihinal nila nga license plate. Ang balaud naglatid gayud nga ang usa ka sakyanan kinahanglan nga adunay duha ka plate numbers, usa sa atubangan ug ang usa sa luyo, walay labut sa motorsiklo. Busa kamo nga nagtaud-taud niining maong mga Vanity Plate, usba ninyo ang pagpahimutang sa inyong PNP 111. Walay nagdili kaninyo pagtaud ana, apan anha sa ibabaw o kaha kilid sa orihinal nga plate number.