EDITORYAL - America igo lang nagpatisoy

Wa man diay ek ang America niining padayong hulga sa China sa pagsipong sa mga isla nga gipanag-iya sa Pilipinas nga nahimutang sa West Philippine Sea lakip ang mga isla sa Spratly.

Kini tungod kay bisan may tratado ang America ug Pilipinas bahin sa pagtinabangay kun ugaling may moataki nga kontra sa hain man niining maong mga nasud, suod usab diay kaayo nga higala ang kagamhanan sa America ug China.

Natataw kini karon kay luyo sa bug-at nga hagit sa China sa Pilipinas pinaagi sa pagyaka nila sa mga isla nga gipanag-iya sa Pilipinas, wa man mo-ek ang America,

Maglisud sila kay kun moapil sila sa maong atraso tulisokon sila sa China kay  mao ra ba kini ang nakatabang sa pagpabangon sa ekonomiya sa Estados Unidos nga nalukapa sa miaging tuig.

Sayo ning tuiga mibubo ang China og 45 bilyones dolyares nga negosyo sa America ug nakatuyhakaw ang    ekonomiya sa maong nasud.

Sa pagkakaron nga natan-aw sa China nga nakuptan niini sa liog ang America , nagtihoy-tihoy na lang kini sa pagpanghilabot sa Pilipinas tungod kay nasayud sila nga di mahitabong mosalmot ang America ning maong atraso.

Gani tungod kay nakita sa China nga way laing mosuporta sa Pilipinas, mikaging sila sa pagpabilin sa ilang mga barko sa West Philippine Sea aron guwardiyahan ang mga isla nga gipanag-iya sa Pilipinas.

Ang ilang pagbirigbirig sa maong lugar  maoy pagpaabot nila nga mo-angka sa Pilipinas sa kahadlok kanila hangtod nga moatras na lang kini sa pagpangangkon sa maong mga butang.

Tataw kaayo nga    kun giangkon man   sa Pilipinas ang maong mga butang kini tungod sa interes nga datu sa minerals sama sa asayte ang ilawom sa kadagatan sa maong mga isla.

Busa ang mahitabo niini mahisama kini sa Mindanao nga gumikan sa kaisog sa mga Muslim, biyaan sa mga Kristiyano ang ilang mga yuta kay inig-atake sa mga Muslim moingon man nga "ok   igsu imo ang titulo ning yutaa apan ang produkto amo".

Tataw kaayo nga mao kining estratihiyaa ang gisagop sa China   kay anaa sa ilang hunahuna nga sa Pilipinas ang maong mga butang apan ang mga rekurso nga anaa niini ilaha. Di ba?