Nakapalit og kinawat nga sakyanan?

Adunay balaod nga nagdili kanato sa pagpalit og mga kinawat nga butang nga gitawag og Anti-fencing law of 1979 kon PD 1612. Busa kun ikaw mopalit og kinawat nga butang mamahimo kang ikiha tungod sa kalapasan sa maong balaod ug mamahimo sab kang pasakaan og kaso isip accessory sa maong krimen basi sa Article 19 sa Revised Penal Code. Busa kini nga pangutana ang atong tubagon karon.

Dear Atty. Divine,

Kanunay gyud ko nga nagsunod sa imong column sa Banat News ug karon naaghat ko sa pagsuwat tungod niining akong problemang legal. Aduna koy napalit nga second hand nga sakyanan niadtong miaging tuig sa presyo nga P 200,000.00. Kompleto ni sa mga papeles ug gani duna gyud mi Deed of Sale sa nagbaligya sa maong sakyanan. Karong bag-o akong gipa-renew ang registration apan wa ni ma-renew kay ang akong mga papeles peke daw ug ang plate number niini dili mao ang description sa akong sakyanan. Nagduda ko Atty. nga kinawat ning maong sakyanan ug unsa may akong buhaton karon? Posible ba nga maapil ko sa pagpasaka og kaso kun pananglitan gi-carnap ning maong sakyanan? Wa na ra ba ko makakita sa tawo nga nagbaligya niini. Palihug tambagi ko kun unsay angay nakong buhaton?

— Dodong

Dear Dodong,

Salamat sa imong pagsuwat. Aron imo gyung mahibaw-an kun unsay status anang imong sakyanan mas maayo nga moadto ka sa Traffic Management Group kon TMG aron imong ipasuta kun dili ba kinarnap nang imong sakyanan nga imong napalit. Importante nga imo ning masayran daan aron makauna ka sa pagpasaka og kaso sa tawo nga nagbaligya kanimo sa maong sakyanan. Basi sa balaod, ang tawo nga magbaligya o mopalit sa kinawat nga mga butang mamahimong mapasakaan og kasong kalapasan sa Anti-Fencing Law ug ang silot nga ipahamtang niini magdepende sa kantidad sa butang nga gikawat. Busa kun mahibaw-an nimo nga gi carnap nang maong sakyanan mas maayo nga imong ikiha ang imong gipalitan niana aron di ka maapil sa pagkiha sa original nga tag-iya niini. Bisan tuod kun in good faith ang imong pagpalit sa maong sakyanan apan tungod kay kinawat ni adunay presumption nga may kasayuran ka kay anaa man sa imong possession ang maong butang nga kinarnap ug dili layo ang posibilidad nga maapil ka sa pagkiha. Ang elements sa fencing mao kining mosunod:

1) a robbery or theft has been committed; 2) the accused, who took no part in the robbery or theft, “buys, receives, possesses, keeps, acquires, conceals, sells or disposes, or buys and sells, or in any manner deals in any article or object taken” during that robbery or theft; (3) the accused knows or should have known that the thing derived from that crime; and (4) he intends by the deal he makes to gain for himself or for another. Mas maayo nga mientras sayo pa mahibaw-an na nimong daan kun unsay status sa imong sakyanan aron di ka maglisud sa pagprobar nga di ka kakonsabo sa mga carnappers ug wa kay kasayuran nga kinarnap diay ang sakyanan nga gibaligya kanimo. Hinaut nahatagan nako og katin-awan ang imong problema.

— Atty. Divine

Daghan na ang nabiktima sa pagpamalit og mga kinarnap nga mga sakyanan. Busa ang maayo ninyong buhaton kun mopalit mo og second hand nga sakyanan mao ang pagsuta daan niini sa Traffic Management Group kon TMG kun di ba kinarnap ang maong sakyanan ug ipasusi sab sa LTO kun dili ba peke ang registration ug uban pang mga papers niini.Kon duna moy pangutana, ipadala lang sa Legal Corner sa Banat News  o email sa [email protected].