Nagduda na ko da

Kinahanglang papaspasan ni Mayor Michael Rama ang paghimo'g mga legal remedy aron malibkas na ang pag "tag" sa tanang deposito sa dakbayan sa Sugbo diha sa Philippine Postal Savings Bank (PPSB) Cebu City-branch. Sayonan ka nga ang tanang deposito sa dakbayan nga anaa pa sa Postal Bank miabot pa man og P124.1 milyones. Apil sa mao nga kwarta ang Time Deposit nga P107 milyones, dayon ang P15 milyones nga Trust Fund ug P818,000 nga Special Education Fund.

Giangkon ni Postal Bank Manager Ricardo Cordova nga kamandoan kini sa ilang mga opisyal sa Manila nga i-"tag" ang tanang deposito sa dakbayan diha sa ilang banko isip pagtuman sa kamandoan sa hukmanan.

Duna kini kalambigitan sa garnishment order sa korte nga nagmando sa banko nga magtagana og P133 milyones aron ibayad sa kabanayan ni Rev. Fr. Vicente Rallos nga midemanda og bayad sa yuta sa namatay'ng pari nga gigamit nga karsada.

Husto ang baruganan ni Rama kabahin sa pagkuha sa tanang deposito niini diha sa Postal Bank. Ayaw na mo pagdeposito diha sa mao nga banko kay dili diay kini molaban sa katungod sa iyang kliyente.

Gibutyag kagahapon ni Konsehal Margot Osmeña nga kining maong banko maoy nag-una kaniadto paghatag og kwarta dihang gipa-garnish gihapon sa korte ang P34.9 milyones ug gihatag gihapon sa mga Rallos.

Lain pa hinoon ang manager sa banko atul sa maong higayon. Angay unta nga panalipdan gayud nila ang katungod sa ilang kliyente.

Dili man sila ma-contempt sa hukmanan kay ang Supreme Court duna may kamandoan nga ang garnishment order kinahanglang adto usa iduso sa Commission on Audit.

Kun ang COA makasuta nga angayan gayud nga bayaran ang mao nga kantidad nga gipa-garnish sa korte, ang COA na maoy moawhag sa City Council nga gahinan na og kantidad ang kantidad nga buot ipa-garnish.

Kining termino nga "garnish" nagpasabot kini nga pugson pagkuha sa hukmanan ang kwarta gikan sa usa ka tawo o government agencies aron mabayran ang obligasyon niini ngadto sa petitioner.

Apan siyaro na man usab og ang kadagkoan sa PPSB didto sa Manila wala sila makasabot kun unsay gipasabot sa Supreme Court? Magduda lang ta da.

* * *

Nabalaka ko sa epekto sa pag-tag sa P124.1 milyones. Ang termino nga "tag" nagpasabot nga ang tag-iya sa kwarta dili makahilabot sa maong kantidad hangtud nga ilibkas ang "tagging."

Ang gikuyawan nako kun masubli ang nahitabo nga ang P34.9 milyones kaniadto gipugos pagkuha sa hukmanan ug gihatag ngadto sa mga Rallos. Ang natan-aw nako nga epekto niini dili maayo alang sa dakbayan. Daghang proyekto ang maapektahan ug dili mapatuman kun madayon nga ma-garnish ang mao nga kantidad. Mao kana nga awhagon gayud nato si Mayor Rama nga papaspasan niya sa mga abogado sa dakbayan nga ma-lifted ang mao nga amount.

Human nga ang Court of Appeals miisyu og Writ of Preliminary Injunction sa tinguha nga pag-garnish sa kwarta, angay unta nga ang banko dili na mohimo'g lakang.

Nagduda lang ko ninyo da. Ang baruganan ni Rama mao nga dili gayud mobayad ang dakbayan sa gipangayo sa mga Rallos.

Dunay dukomento nga nakuha si Rama nga kaniadtong 1940, nagkasabot na ang mga Rallos nga ang karsada nga anaa mag-agi sa ilang yuta, Aznar Road ni karon, ila gani nga idonar sa Cebu City.

Karon pabayron na hinoon?