Daghan nang nakapaniid nga ang mga water dispenser kun di kahinloan sulod sa usa ka buwan, mapuno sa pito-pito ang ilawom.
Bisan ang mga water dispenser sa sud sa bay, magkapal gyud ang hugaw sa ilawom kay bisan walay lamok o langaw ug uban pang mga insektos nga makasud kay lagi anaa man sa sud sa bay, motumaw lang gihapon ang pito-pito sa ika-duha o ika-tulong semana kun di limpiyohan ang sulod niini.
Sa duha pa lang ka semana nga gidugayon bisan pa kun kada adlaw sambogan og tubig ang dispenser apan di limpyohan ang sulod niini sa iyang lamog-lamog, motumaw gyud ang pito-pito .
Kay ang hustong pag-atiman sa kahinlo sa sulod sa water dispenser, kausa gyud sa matag semana, aron way lamog-lamog ug di usab makahuygo pagpakabuhi ang pito-pito.
Unya ang mga water dispenser sa mga sidewalk nga peso-peso naay tagkapin nang tuig nga way hinlo-hinlo, buot ipasabot nga baga pa sa lapok sa sapa sa Palma ang lamog-lamog niini sa ilawom ug pila na kaha ka gatos ka tawo ang nakasuyop sa maong lamog-lamog ug sa pito-pito niini.
Ang pito-pito ra ba di gyud kaayo mailhan gawas kun sil-ingon nimo og maayo ang plastic nga sudlan sa peso-pesong tubig gumikan sa kapino niini.
Ambot kaha ang taga City Health Office mura man og gikapoyan sa pagsusi sa maong mga baligyaanan og tubig nga nanurok murag uhong sa mga sidewalk ning dakbayan.
May mga taho nga paninglan og business permit sa taga City Hall ang mga operator niini apan namingaw man ang tanan ug mura man og wa gyud matuman.
Abi tingale sa taga City Hall kay ginagmay ra man ang maong negosyo, apan wa nila huna-hunaa ang kadako sa epekto niini sa lawas sa tawo kun ugaling makamugna man og bug-at nga sakit ang hugaw nga gikan sa ilawom sa dispenser ilabi na ang pito-pito.
Aw hinuon kun ang mga pito-pito ug ang lamog-lamog nga mainom sa tawo makatambok sa lawas sa makainom, mas labing maayo.
Busa kun ingon niini ang kadanghag sa mga otoridad, pun-an sa kadanghag sa publiko aw na hala kombati lang. Di ba?