EDITORYAL - Kaluoy sa mga batang malumos

Nagsunodsunod karong mga panahona ang mga balita bahin sa mga bata nga nangalumos sa sapa, sa dagat , sa swimming pool, may nalumos pa gayud sa tubig sa baril ug uban pang nalumsan.

Ang bata, bata gyud ug kun madisgrasya man siya, kana nagpasabot nga napasagdan siya sa dagko nga nagbantay kanila.

Di mabasul ang batang gagmay nganong nalumos sila, kundi ang angay mabasul niini ang mga dagko nga nag-atiman kanila.

Sa bahin sa pangaligo uban ang mga bata, ang mga ginikanan nga tarong di ganahang maligo samtang ang ilang mga anak nga gagmay ug dagko naglangoy-langoy pa sa tubig o kaha sa dagat.

Sa mga lugar nga maglabo ang katawhan sama sa mga beach, swimming pool ug uban pang lugar, ang kakulba sa ginikanan nga magsud-ong sa ilang mga anak nga mahisagol sa daghang tawo di matukib.

Tungod kay ang lingaw-lingaw sa dagat o kaha bisan asang dapita , kasagaran sa bata mopahimus gyud niini sa way kabalaka sa dautang panghitabo nga nagpahipi sa ilang kinabuhi.

Sa maong higayon anha masukod kun unsa kamabinantayon ang mga ginikanan kinsa nagtinguha nga malampuson ang kalipay sa ilang paglingaw-lingaw.

Di kay malipayon sa paggikan kay husto pa ang gidaghanon sa panon, apan mopauli na nga masulob-on kay kuwangan na ang grupo kay may namatay na.

Kining tanan anaa sa mga ginikanan diin sa panahon nga kaalegre ang ilang mga anak di sila magpatintal aron mounong   sa kasadya nga gibati sa ilang mga minahal hangtud nga makalimot na sila sa nahimutangan sa uban nilang kauban sa lingaw-lingaw.

Mas kalipay nila nga magsud-ong sa kalipay sa ilang mga anak o kaha mga apo kun sila mismo maoy mobantay sa matag lihok sa ilang mga anak .

Kay nasayud sila nga kun mouban sila sa ilang mga anak sa pagsawom-sawom sa dagat o kaha pagkalingaw sa unsa mang gimbuhaton, di mahimutang ang ilang kaugalingon.

Ang ilang buhaton mao ang pagtutok sa ilang panan-aw ug sa pag-imbintaryo matag karon ug unya sa ilang tanang kauban sa grupo sa pagsiguro nga kompleto ug luwas kanunay ang tanan sa ilang pangaligo. Di ba?