Mao kini unod sa tema sa National Nutrition Month “Pagkaon og utan batasanon, iandam kini matag adlaw”
Karong panahona wa na malilong sa kadaghanan nga ang pagpunay og kaon sa tambok ug mantikaong mga pagkaon, dali rang makapainutil o kaha makamatay sa tawo.
May kinomedyang panultihon ang uban nga nagkanayon, kun suguon na gani ni Mrs. si Mr. nga pakan-on adlaw-adlaw og litson, adobo, humba ug uban pang tambok nga pagkaon, angay magbantay si Mr, kay, may planong dautan si Mrs.
Kay gusto na kini nga indirektang matipok si Mr. aron ipuli si kompare.
Bitaw sa pagkatinuod bahandi kaayo sa tawo ang kinaiya nga pagkahingaon og utan.
Kay karong panahona nga midagsang ang gitawag nga western foods o mga pagkaon nga naandan sa mga tawong taga gawas sa nasud ug gimontar dinhi sa Pilipinas, ang kasagaran sa mga bata karon wala na makaila og utan.
Kasagaran sa ilang nailhang pagkaon mao kanang anaa sa mga inila na kaayo karong mga fast foods outlet kansang mga pagkaon sumala pa sa mga doktor makapamubo sa kinabuhi.
Apan ang kagamhanan way puas sa pagpahinumdom sa publiko nga angay gyung batasanon ang pagkaon og utanon matag adlaw aron nga layo sa bug-at nga sakit ang lawas, ug kun mamatay man, di ahat nga pagkamatay kundi kamatayon gyud nga kabubut-on sa Dios nga maoy naghatag og kinabuhi sa tawo.
Ang atong mga batid sa pagkaon sama sa taga National Nutrition Council maoy gipiyalan sa goberno sa pagsangyaw sa mga maayong balita bahin sa kamahinungdanon sa utan.
Ang atong mga mag-uuma maoy usa sa bulahan kaayo kay anaa ra sa ilang mga tugkaran ang mga utanon. Apan ang nakasipyat lang usahay sa ubang mga mag-uuma kay imbis sustansyado kaayo ang utan nga sud-an, subakan man sab og tagsa ka kilong ginamos o kaha buwad nga tabagak, di maguba lang gihapon ang kidney. Di ba?