May usa ka babaye nga nasakit og kanser. Gibati gayud niya ang tumang kaguol sa paghuna-huna sa mga butang nga iyang napundar nga iya unyang biyaan. Sa iyang pagbalik-lantaw sa mga mangagi iyang nakita ang iyang kaugalingon nga kanunay nag-ugmad para makab-ot ang iyang tingusbawan. Sa maong kahimtang wala niya nabatyagan ang kalipay gani wala siya'y panahon para maghudyaka uban sa iyang pamilya ug mga higala.
Nibati siya og pagmahay nga wala siya moambit sa mga talidhay sa iyang mga kauban labi na nga giingnan siya sa doktor nga ang mga kabalaka usa sa hinungdan sa iyang mga sakit.
Ang katawa usa sa mga bililhong gasa gikan sa Ginoo. Pinaagi niini makasandurot nato ang mga tawo sa atong palibot. Nakapadasig kini dili lamang sa kalag apan nakaayo pa gayud sa mga sakit sa atong lawas. Kini maoy nakapositibo sa atong mga panglantaw sa kinabuhi. Angay natong hunahunaon nga ang kinabuhi lumalabay ra ug angay natong tagamtamon ang kaanindot niini pinaagi sa mga katawa ug talidhay sama sa kanta nga " Tawanan mo ang iyong problema".