EDITORYAL - Mga opisyal sa barangay angay may plano

Ang kapakyas sa kagamhanan   sa pagbukas og mga patigayon sa mga kalungsoran maoy magtukmod sa katawhan sa pagbalhin ngadto sa urban nga mga lugar aron adto manginabuhi. Ingon niini ang nahiaguman sa mga dagkong dakbayan kansang tagdumala o kaha molupyo nagbaguod sa pagpas-an sa suliran bahin sa kadaghang eskuwater, mga kriminal, nagkalainlaing bisyo, ug sa laktod mao pay pag-ingnon sa mga kapolisan nga kun hain tong lugar nga daghan ang tawo di usab kalikayan nga anha manukad ang nagkalainlaing krimen.

Sa pagkakaron tinuod kompleto ang nasud og mga opisyal sa barangay, lungsod, siyudad ug lalawigan apan kuwang ang maong mga opisyal sa plano unsaon sa matag barangay nga mabuhi sila pinaagi sa mga industriya nga mugnaon sa mga namunoan sa nasud.

Ang barangay maoy labing gamay nga bahin sa goberno kansang rekurso angay manukad sa mga maayong plano sa mga opisyal niini uban sa abag sa kagamhanan sa lalawigan ug sa tibuok nasud. Ang himoon sa mga opisyal sa barangay mao ang pagplano unsay angayang panginabuhi sa iyang mga molupyo aron maharuhay kini sa pagpuyo.

Kun masuta nila ang angayang panginabuhi sa iyang mga katawhan aron kini mapugngan nga di molayas aron adto manginabuhi sa siyudad, diha-diha himoan kini sa mga opisyal og rekomendasyon ngadto sa lungsod, dayon ihandos sa mga opisyal sa lungsod ngadto sa lalawigan.

Kun masuta sa lalawigan nga may ikatabang sila aron molambo ang maong proyekto angay nila kining suportahan aron ang mga molupyo sa maong barangay modukot sa maong dapit ug di na mobalhin og laing lugar kay may panginabuhi naman sila nga ikasuporta sa panginahanglan sa matag pamilya gikan sa pagpuyo, panginabuhi, panglawas ug edukasyon sa mga anak.

Kun ang kagamhanan sa lalawigan way ikasarang sa paggasto sa proyekto sa barangay, mangayo kini og tabang sa nasudnong kagamhanan aron nga molampos ang usa ka proyekto sa matag barangay.

Ang nahitabo karon kay ang matag magtiayon sa matag barangay way laing giplano kundi ang pagpanday og bata tungod kay ang ilang mga lider wa may plano kun unsaon paghatag kanila og panginabuhi o kaha pagtabang nga moumento sa ilang panginabuhi aron mabuhi sila nga malinawon ug lawas lay agdon sa asawa kanus-a kini mohunong sa pagpanganak.  

Gumikan sa kakabus, molayas kini ug biyaan ang ilang barangay dayon moadto og siyudad aron adto manginabuhi.

Ang maong senario nga maoy nasaksihan nato karon way kasulbaran tungod kay nagpabiling stagnant ang mga opisyal sa barangay gawas niadtong mga lugar kansang mga opisyal may maayong plano alang sa panginabuhi sa ilang mga molupyo.Di ba?