Nganong datu sila unya kabus 'ta?

Di’ lang sa hamtong maggikan ang maong pangutana. Bisan ang mga bata, luyo sa ka inosente sa ilang panghuna-huna makapangutana nganong adunay mas mahal nga duwaan ang iyang classmate, nganong mas nindot ang sapatos sa iyang amigo o nganong nakapalit og labing bag-ong play station ang iyang silingan. Bisan kun nagtrabaho na ang usa ka tawo, makapangutana gihapon siya nganong igo lang siyang gi-sweldohan. Nganong di’ siya ang amo? Nganong di’ siya ang tag-iya sa negosyo? Ang trabahante sa gobyerno makapangutana ‘sab nganong mas ubos gihapon iyang ranggo itandi sa bag-o lang su’d nga empleyado. Sa samang higayon maka-ingon siya nga gamay ra ang iyang sweldo itandi sa mga bag-o lang su’d.

Sama ra nga wa’y katapusan ang mga pangutana nganong mas adunahan sila kay sa nimo, mao ‘sab kakuwang sa katagbawan sa usa ka tawo. Di’ ang pagka-hakog ang nagtukmod nila sa paghuna-huna sa maong pangutana, apan ang kamatuoran mismo nga ilang makita unsa ka di’ patas ang kalibutan sa pag-bahin-bahin sa grasya. Apan ang kaadunahan sa tawo di’ kinahanglan nga ihangad sa langit ug pangayuon. Inay kinahanglan nga paningkamotan. Niining bag-o, nagpagawas ang Forbes Magazine sa panga’n sa 40 ka labing adunahang Pilipino. Wa’ na ‘ta matinga nga si Henry Sy, ang tag-iya sa SM Prime Holdings ang mag-una gihapon sa listahan nga adunay 9.1 bilyones dolyares.

Apan nakakuha sa labing dakong atensyon mao ang pagsu’d ni Edgar Sia sa ika-40 nga pwesto. Kinsay magtuo nga ang usa ka architect nga negosyante makasu’d sa listahan human niya gibaligya ang iyang ‘food chain’ sa labing adunahang food chain sa nasud. Ang pagkasu’d ni Sia naghatag og paglaom sa uban nga di’ sa tanang higayon ihikaw ang pagka-adunahan ug adto lang ni kanunay motugpa sa mga tawo nga nakasunod sa dakong katigayonan gikan sa ilang kaliwat. Ang labing maayo nga mensahe mao nga patas ‘tang gihatagan sa higayon nga madato apan nagkuwang o di’ ba kaha dakong pakyas ang atong diskarte sa pagpalambo sa maong katigayonan. Bisan ang bibliya naghisgot sa sugilanon sa pagpadato ug giunsa sa pagpalambo sa usa ka anak ang iyang katigayonan samtang ang usa nag-usik-usik ug ang laing usa, nilubong sa iyang nadawat aron di’ kawaton gikan niya.

Ang bibliya ‘sab mismo ang nagbutyag nga adunahan ang mga kabus tungod kay makasu’d sila sa gingharian sa Ginoo. Siguro mao ni ang prinsipyo nga nagduwa sa huna-huna sa mayoriya kanato nga dakong grasya ang pagka-kabus tungod kay di’ ihikaw ang gingharian nga wa’y katapusan kanila. Kung sa yanong pagsabot ipaagi ang tanan—siguradong daghan kanato ang mobalibad sa mga maayong higayon ug mopadaplin sa gasa nga mamahimong adunahan. Ang pagkakabus nagpasabot ni og paghatag sa imong kaugalingon, lakip na ang imong gitapigan nga katigayonan ngadto sa uban nga nanginahanglan.

Pila lang nato ang nakapangutana kung giunsa sa mga bilyonaryong Pinoy sa pagpadato ug giunsa nila pagsuong ang mga kalisdanan nga ilang giatubang aron sa pagkab-ot sa ilang estado karon. Ang sagad nga motumaw nga pangutana sa atong huna-huna kung unsaon nila sa paggasto ang salapi giangkon karon ug sa unsang paagi nga maka-ambit ‘ta sa ilang grasya. Di’ na nato katungod ang pagsusi kung ila bang nakuha ang ilang katigayunan sa limpyo nga paagi ug kung ila bang nabahinan ang ilang mga empleyado sa katigayonan nga ilang naangkon. Ang labing batakang pangutana kung sa unsa ba nga paagi nga mopahiyom ang kahitas-an sa ilang ka-adunahan dinhi sa yuta aron susamang estado ang magpaabot nila didto sa sunod nga kinabuhi.

* * *

Email: [email protected] or [email protected]