Kinsay sayop?

Sa akong pagtimbang-timbang, angay pa gani nga malipay si Mayor Michael Rama kun ang Department of Public Works and Highways (DPWH) motabang sa pagsemento o pag-aspalto sa mga karsada dinhi sa dakbayan.

Dili angay’ng masuko ang mayor ug mohulga na hinoon nga ikiha ang kadagkoan sa DPWH kun mamugos pagsemento o pag-aspalto sa mga karsada nga wala kaayo maatiman sa taud-taud na nga panahon.

Kanindot man kun adunay motabang sa dakbayan aron mapanindot ang atong mga karsada. Angay’ng ihiklin nato ang pamolitika. Nakasabot ko nga nahadlok si Mayor Rama nga basin og ang mohatag sa pundo sa DPWH mao ang kontra niya sa politika.

Kun ingon man gani niini ang sitwasyon, mabentahaan ang katawhan kay imbis makapahimulos na unta kini og nindot nga karsada, babagan man sa mayor. Sama didto sa Alaska, Mambaling nga buot unta nga ipasemento ni Kongresista Tomas Osmeña.

Gidali-dali usab og pasemento ni Mayor Rama. Aw nindot na usab hinoon apan ang semento dihang dapita dili magdugay kun itandi sa semento kay kanunay man nga malunopan ang maong lugar. Semento gayud ang angay diha.

Pasagdihi lang gud mayor kun ang kontra nimo nga politiko mohimo’g project dinhi sa dakbayan. Kun imong pugngan, mahimong masuko hinoon ang mga tawo kanimo.

Aw hinoon, kinahanglan usab nga ang DPWH mokonsulta sa mayor apan dili kay babagan ang pagpatuman og proyekto.

* * *

Angay bitaw nga pakunhoran pa gayud ang pletehan sa mga public utility vehicles, ilabi na ang mga PUJ, karon nga mius-os na pag-ayo ang presyo sa mga petroleum products.

Kun dili kini himoon, mabentahaan sa mga drayber ang mga sumasakay nga walay umento sa sweldo unya dagko og pletehan. Kaswerte sa mga drayber no? Angay tingali nga himoon na lang tag P7 ang minimum nga pletehan sa mga PUJ.

Maayo ang plano ni Vic Sapio nga maoy pangulo sa Consumers Rights for Economic Welfare nga mohimo’g petisyon sa LTFRB nga pakonhuran ang pletehan ngadto na lang sa P7.

 Unya, nindot usab kaayo ang sugyot ni Valenzuela City Mayor Sherwin Gatchalian nga kinahanglan nga ang LTFRB magmugna og sumbanan nga kun dunay pagkunhod sa presyo sa gasolina ug krudo, diha-diha usab dayon nga pakunhoran ang pletehan sa mga public utility vehicles.

Bitaw, husto si Mayor Gatchalian kay samtang magpaabot ang LTFRB nga adunay request o petisyon, mahimong ipatuman na lang dayon kini sa mga drayber. Kun mosaka ang presyo sa gasolina ug krudo, pasakaan usab ang pletehan.

Sa ingon nga paagi, dili mabentahaan ang mga drayber ug mga pasahero. Bilib usab ko sa sugyot ni Mayor Gatchalian kay makahatag kini og kaayohan sa kinabag-an nga katawhan.

Pasagdi lang na ang kumentaryo sa kadagkoan sa Cebu Confederation of Transport Operators and Drivers Inc. nga gusto gayud nga bisan og mikunhod na ang presyo sa gasolina ug krudo, pirmi ang ilang pletehan nga kolektahon.

Tiaw mo, tag P40 na lang ang presyo sa krudo ug P50 ang gasolina, walay labot sa mga special fuel.

Kun ako ang pagbut-on, gusto ko sa sugyot ni Mayor Gatchalian kay sa maong paagi, walay mabentahaan.