Ang suliran sa baha ug kagutom

Dili ikalimod nga nag-unang suliran nga gisagubang karon sa katawhan nga nagpuyo sa ubos nga lugar ang pag-awas sa tubig gikan sa mga sapa ug mga kanal sa matag panahon nga kusog ang pagbunok sa ulan.

Kini ang hinungdan nga ang kagamhanan sa mga dapit nga nakasinati niining maong matang nga suliran maoy ilang gihimo ang pagpangita og kasulbaran pinaagi sa paghimo og mga plano ug mga pagtuon.

Daghan ang nag-ingon nga alang kanila ang suliran sa pagbaha wala nila pagaisipa nga bug-at nga suliran sa kagamhanan tungod kay mahitabo man lang ang pagbaha ug pag-awas sa tubig gikan sa mga kanal ug mga sapa sa matag higayon nga kusog ang pagbunok sa ulan.

Matud pa nila kun walay kusog nga ulan nga masinati sama pananglit sa panahon sa ting-init tataw usab nga walay mahitabo nga pag-awas sa tubig gikan sa mga sapa o mga kanal.

Naghimo na og mga lakang ang goberno sa pagsulbad sa maong suliran ug dako ang ilang pagtuo nga kahatagan kini og katumanan sa umaabot nga mga panahon.

Ang pipila ka mga lokal nga kagamhanan isip temporaryo nga paghatag og kasulbaran sa maong suliran mao ang paglimpiyo sa kasapaan ug mga kanal sa ilabay nga mga basura.

Ang labing bug-at nga suliran nga nagkinahanglan nga kahatagan usab og kasulbaran sa kagamhanan mao ang panginabuhi sa katawhan tungod kay mosangko man kini sa bation nga kagutom.

Matud pa nila nga masulbad gihapon kini sa kagamhanan kun matinud-anon lamang sa pagsulbad pinaagi sa pagkabig sa mga kapitalista sa pagtukod og ilang negosyo.

Sa tukoron nga negosyo sa mga kapitalista maoy mosunod niini ang panginahanglan og mga trabahante nga makahatag usab og panginabuhi nga makasukbang sa gibating kagutom sa ilang tagsa-tagsa ka mga pamilya. (Romeo T. Limpangog)