Ang politika ni Enrile

Gisugyot ni Senate President Juan Ponce Enrile ang pag- uswag sa piniliay sa mga opisyales sa barangay unya sa tuig 2016. Kini tungod kay daghan na kuno kaayong piniliay. Gisugyot usab sa pangulo sa Senado nga himoong unom ka tuig ang termino sa mga opisyales sa barangay sama sa mga Senador ug kausa ra usab makapapili pag-usab.

Kun matugotan ang maong sugyot, ang mga opisyales sa barangay moalagad na unya kini og hangtod sa tuig 2016 ug ang mga opisyales sa Sangguniang Kabataan o SK molapas na sa gisita nga edad sa mga SK.

Ang kadaghan sa piniliay nga gihimo sa Commission on Election dili maoy tinuod nga rason kun nganong ipauswag sa pangulo sa Senado, Juan Ponce Enrile ang piniliay ngadto sa tuig 2016. Plantada lang kini ni Senate President Juan Ponce Enrile aron masalipdan ang tinuod niining tuyo ug kini mao ang pagpangampanya alang sa kandidatora sa iyang anak nga magpapili pagka senador hulip kaniya.

Gipuntarya ni Enrile ang mga opisyales sa barangay tungod sa kadaghan nila. Ang sugyot nga uswagon ang piniliay sa barangay sa tuig 2016 usa ka pagpanghaylo ni Senate President Juan Ponce Enrile ngadto sa mga opisyales sa barangay aron suportahan ang kandidatora sa iyang anak. Gustong paniguroon sa pangulo sa senado nga aduna gihapoy Enrile nga bansagon nga magtikaw-tikaw sa Senado.

Ang anaa sa huna-huna ni Enrile mao usab ang anaa sa huna-huna sa ubang mga magbabalaud sa nasud, mga mayor ug mga gobernador tungod nasayod sila nga ang mga opisyales sa barangay ang kadaghanan kanila kamaong molingi og utang kabubot-on. Pagkasubo nga palandongon nga mao ra gayoy gilantaw sa atong mga politiko ang ilang mga kaugalingon.