Pangandam sa taytayan

Ang labing lisod nga bahin sa pag-ayo sa Marcelo Fernan Bridge, ang ikaduhang taytayan nga nagsumpay sa mga dakbayan sa Mandaue ug Lapu-Lapu, mao ang pag-ukab sa mga goma nga sumpay ug sa putos nga aspalto, pagbuak sa semento, pagtaod sa bag-ong sumpay ug pagbubo og semento sa duha ka lanes gikan sa Mandaue paingon sa Lapulapu. Kun basehang kalendaryo sa Department of Public Works and Highways (DPWH), mahitabo ni sunod buwan. Apan tungod sa kapaspas sa kontraktor, nga ang unang lane nahuman og siyam inay sa gitakdang 14 ka adlaw, mahimong labing maapiki ang trapiko sa di pa matapos ning buwana.

* * *

Kay ang maapektahan sa ikatulo ug ikaupat nga hugna sa trabaho mao ang mas daghang mga sakyanan ug pasahero gikan sa mainland sa Sugbo paingon sa Mactan Cebu International Airport (MCIA). Matud ni Assistant District Engineer Renault Ricardo sa 6th Engineering District sa DPWH mao ning bahina sa proyekto nga kinahanglang pangandaman pag-ayo sa lokal nga mga opisyal.

Nga wa himoa sa mga tagduma sa trapiko sa Mandaue ug Lapu-Lapu. Tingali tungod sa panultihon sa katiguwangan nga unya na manguros kun kilatan na. O tingali tungod lang kay di ingon niana kagubot ang trapiko sa pagtak-op sa usa ka lane sa taytayan gikan sa Lapulapu paingon sa Mandaue sugod niadtong Hunyo 4.

* * *

Gipaabot nga di gihapon grabe ang pagkabara sa mga sakyanan inig sugod sa pag-ayo sa ikaduhang lane (ang duol sa tungatunga nga island sa taytayan gikan sa Lapu-Lapu paingon sa Mandaue). Gitakda gihapong mahuman sud sa 14 ka adlaw apan mahimong kaablihan na human sa siyam.

Sa ato pa, mahimong matrabaho na ang ikatulong lane (duol sa daplin sa taytayan gikan sa Mandaue paingon sa Lapu-Lapu) sugod sa Hunyo 18 ug ang ikaupat nga lane (duol sa tungatunga nga island gikan sa Mandaue paingon sa Lapulapu) sugod sa Hunyo 25. Mahibaw-an na nianang higayona kun gamay ra ba gihapong kalangay sa mga sakyanan, sama sa gilaoman sa lokal nga mga opisyal, o mas grabe bang kahuot, suma sa pasidaan sa DPWH.

* * *

Karon pa lang, di makadaot sa tanang hingtungdan kun susihon sa lokal nga mga opisyal ang alternatibong mga agianan kun simbako, napilde ra ba si Manny Pacquiao ni Timothy Bradley, matanggong gyud ang mas daghang pasahero:

l Kadugangan bang mga biyahe sa ferry gikan ug padung sa Muelle Osmeña sa Lapu-Lapu ug Pier 3 sa Dakbayan sa Sugbo;

l May lain bang kadunggoan di lang ang mga pasahero kun dili hasta sab ang mga sakyanan ug kargamento sa Lapu-Lapu ug mainland Cebu; o

l Panahon nang tun-an ang dugay nang giyak-an nga sugyot sa pagtukod sa gikinahanglan nga ikatulong taytayan gikan ug paingon sa Lapu-Lapu?

* * *

Email: [email protected]