Balikbalik nga suliran sa baha ug sunog

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Daghan ang nag-ingon nga nagbalikbalik lang mga nasinati nga suliran nga giatubang sa kagamhanan sa mga mabiktima sa katalagman sama sa sunog, pagbaha ug uban nga ang sagad nga kahatagan og unang pagtagad ang mga nag-una niining panginahanglan sama sa pagkaon, sapot, galamiton sa kusina ug daghan pa.

Kini ang hinungdan human mahitabo ang katalagman maoy mosunod ang mga pagtunol og hinabang sa mga biktima sa katalagman sama sa nahitabong sunog sa sitio Camansi sa barangay Paknaan, dakbayan sa Mandaue nga gilangkoban sa kapin sa 200 ka mga pamilya.

Gikan sa kagamhanan sa maong dakbayan ang nadawat nga hinabang sa mga biktima ug gikan usab sa pribadong sektor nga nakapaluagluag og gamay sa kalisod sa ilang kahimtang.

Gipadangat ni Board Member Thadeo Ouano sa ikaunom nga distrito sa lalawigan sa Sugbo ug ang iyang anak nga si Konsehal Lollipop Ouano Dizon ang ilang hinabang ngadto sa mga biktima sama sa bugas, noodles, balde, mga sapot ug uban pa niadtong miaging hapon.

Nagsunod usab sa paghatag og hinabang ang buhatan ni 3rd District Congressman Pablo John Garcia ug Gobernador Gwendolyn Garcia nga naglakip sa mga kahimanan sa kusina ug uban pa.

Si Barangay Kapitan Malaquias Soco nga maoy kapitan sa barangay Paknaan sa maong dakbayan miingon nga ang luna nga gipuy-an sa maong gidaghanon iya sa pribadong tag-iya.

Dugang pa niya nga gipaniguro na hinuon sa tag-iya sa maong luna nga gipuy-an sa mga biktima nga makabalik sila sa pagpatukod sa ilang panimalay. Gitataw ni Kapitan Soco sa pagbalik og tukod sa mga panimalay sa maong dapit maoy ilang himoon ang pagbutang na gayod og tukmang karsada kay pinaagi lamang niini dili na magbalik-balik ang ilang nasugatan nga problema.

Matud pa ni Kapitan Soco nga atol sa pag-ulbo sa kayo sa maong dapit maoy nahimong suliran sa mga bombero ang kalisod sa pagpasulod sa trak sa mga bombero.

Dugang pa niya nagsikitsikit ang mga balay sa maong dapit ug walay karsada nga kasudlan ang trak sa mga bombero maoy hinungdan nga ang gihimo nagsumpaysumpay sa ilang hose ug naabtan na lang gayod sa pagkaugdaw sa maong gidaghanon sa mga panimalay ug wala gayod makapugong ang mga bombero. (Romeo T. Limpangog)