Duna pay mga maayong tawo ning atong nasud!

Usa ka higalang operator sa taxi misugilon kanako nga usa ka buntag, usa sa iyang mga driver mitunol ngadto kaniya og usa ka laptop, nabiyaan kono sa pasahero. Maayo man gani kono kay wala makit-i sa laing mga pasahero. Diha na siya kakita sa laptop sa dayon na niyang garahe.

Si Dodong Casinillo sa San Nicolas Proper, misugilon usab kanako nga iyang nabiyaan ang iyang pitaka sulod sa taxi. Mao pay iyang pagkahibawo nga nabilin ang iyang pitaka pag-ilis na niya … ug wala na siya magpaabot nga ma-recover pa.

Apan, pila ka minutos, may taxi nga mihunong atubangan sa ilang gate, misilbato, ug sa iyang paggawas gitunol sa driver ngadto kaniya ang pitaka. Subra ang iyang pagpasalamat, ug mitunol siya’g pahinungod, apan wa dawata sa driver.

Laing higala, usa ka senior citizen, misugilon usab kanako nga usa ka higayon, tungod kay puno na ang PUJ, kapyot na lang. Naglisud siya kaylagi, senior citizens na, ug nag-backpack pa gyud.

Tungod kay moderno na man ang panahon, walay mi-offer kaniya’g lingkoranan, obsolete na ang pagka-gentleman, ug pagka-chivalrous. Apan, sa wa niya damha, usa ka bugoy-looking nga batan-on, naglago lang, kapyot pud, mi-offer nga siyay mobitbit sa backpack sa senior citizen nga gipaningot nag maayo. 

Naka-experience sad ko, usa kahigayon, sa may Carbon market dapit, na-shot sa lungag ang pangunahang ligid sa akong kotse. Unsa may akong mahimo? Dihay pila ka tawo nga naglingkod sa daplin sa dalan, apan wa lang magtagad.

Apan, kalit dihay tawo nga daku’g lawas, milabay, ug sa walay tingog-tingog, iyang gialsa ang ligid, dungan ang pagsinyas kanako pagpaabante, ug nalibre ang ligid. Miaksyon kog gawas sa awto aron motunol og kwarta, pasalamat sa iyang gibuhat, apan, misutoy siya sa unahan. Sa ato pa, wa siya magkinahanglan og balus sa maayo niyang buhat.

Daghan ang susamang mga sugilanon ang atong nadungog, and perhaps, inyo sad nasinati. Sa Manila, daghang mga instances nga pipila ka langyaw mipabati sa ilang kahimuot sa ka-honest sa mga driver sa Manila, miuli ngadto kanila sa mga butang nga ilang makalimtan sulod sa sakyanan. Kini nakahatag kanato’g maayo nga impression, sukwahi sa ilang nadunggan nga kita dinhi mga kawatan. Apan, diyutay ra ni sila. Duna gyuy mga tawo nga nahimo nang hobby ang pagtunol og tabang ngadto sa uban, sa walay pagpaabot og return. Nindot.  

* * *

Ang kadagkuan sa mga senior citizens sa kaulohan naglaraw pagbutang og dugang senior citizens party-list representatives didto sa Kongreso, sa umaabot nga eleksyon. Kini, aron kahatagan og hingpit nga pagtagad ang mga concerns sa senior citizens sa tibuok nasud.

Concern kini, dili sa mga senior citizens lamang, kundili sa tanang molupyo ning nasud, tungod kay sa gusto kita’g sa dili, kitang tanan, gikan sa mga senior citizens, ug kitang tanan padulong sa pagka-senior citizen. Busa, kun mahinayon ni, atong paluyohan ang party-list sa mga senior citizens.

Ang atong pagpaluyo kanila, atong gipaluyohan ang atong mga ginikanan, ang atong mga lola o lolo, ang atong mga uyoan o iyaan, ang tanang katigulangan sa atong nasud. Kadiyot lang.