EDITORYAL - Tandugong lawas di siguradong hapin para ipsot

Kun ang bahin ni Kongresista Ruben Ecleo maoy hisgotan, maayo kaayong sundon ang gihimong estelo sa iyang mga abogado ug doktor kinsa mipamatuod nga sama siya sa usa ka bombang talibuto nga kun di hatagan sa kagawasan, moulbo sa prisohan.

Ang mga prosecutor mikaging nga wa kalihok sa maong argumento tungod kay giingong kinabuhi sa respondente ang nakataya, nga kun mamatay si Ecleo sa prisohan peligro kaayo og kalagon ang huwes , prosecutor ug   mga abogado sa kihante.

Pagkagawas ni Ecleo puwerting lipaya niini, mikandidato pagka-kongresista, midaog, apan ang pangutana asa naman siya karon? Nakabuto ba?

Apan niadtong gisundog kining maong estelo ni kanhi Presidente Arroyo pinaagi sa maniobra ni CJ Corona, nga giingong tandugon kaayo ang kinabuhi niini o sama kang Ecleo nga taliboto na, wa na kini mosaler kay daghan nang nakaamgo sa maong estelo.

Bisan kun gigakotan na og bagang bugkos ang liog ni Arroyo, wa na mailad ang mga doktor ug labaw sa tanan ang kalihim sa Department of Justice kinsa nakaingon , estoryaheeeeeeeee.

Gipakagulkol kini sa prisohan hangtod karon, unya ang pangutana mibuto ba siya ?

Unya si CJ misuway na usab og apply sa maong estratehiya. Miatubang sa mga huwes sa impeachment court nga nagsakay og wheelchair pamasin nga makombinsi niya kini nga di nalang siya imbistigahon kay tandugon ang iyang kinabuhi, ambot kun unsay huna-huna karon sa mga huwes nga senador.

Di kaha sila maluoy kang CJ ilabi na niadtong mitibi kini sa ilang atubangan pipila ka higayon samtang nagbasa sa sinuwat niyang sentimento batok sa mga tawong may labot sa pagsang-at sa iyang impeachment?

Gani dihang mipabuhagay siya sa iyang mga luha, miduyog usab ang iyang mga supporter sud sa impeachment court ug kadtong didto sa korte suprema kinsa mipatuasik   usab sa ilang mga luha kay mibati sila sa kasubo ug kasakit nga gihambin ni CJ. Di ba?