Unsay katungod sa usa ka testigo

Maayong Miyerkules kanatong tanan. Adlaw karon sa Inahan sa Kanunay’ng Panabang o Mother of Perpetual Help busa ayaw mo kalimot sa pagbisita sa atong simbahan. Timing kaayo ning pangutana nga gipadala kanato taliwala sa nagkainit karon nga Impeachment trial batok ni Chief Justice Renato Corona. Ang atong tubagon karon mao kining pangutana labot sa katungod sa usa ka testigo.

Dear Atty. Divine,

Di gyud ko mosipyat sa pagbasa sa imong column sa Banat News kay ganahan man gud ko og mga legal issues. Kining akong pangutana Atty. Divine dili ni akong kasinatian apan ako ni nga ipangutana nimo aron masayud ko kun unsay anaa sa atong balaod. Kanunay ko nga nagtan-aw sa Impeachment trial ni Chief Justice Renato Corona sama sa akong gibuhat kaniadto nga nagsunod ko sa trial ni kanhi President Joseph Estrada. Ang akong namatikdan sa trial karon sa Senado Atty mao kining mga testigo nga insultuhon ug kasab-an sa mga Senator-Judges aside sa mga abogado sa prosecution nga kanunay sab nga makatilaw og kasaba sa ubang senador. Maluoy ko magtan-aw sa mga testigo atty ilabi na kun mga pribadong tawo nga mauwawan gyud kay televised man ang hearing. Ang akong pangutana atty, wa ba diay balaod nga magprotihir sa mga testigo? Sakto ba ning gibuhat sa ubang senator-judge nga ilang insultuhon ang mga testigo. Hinaut imong matubag kining akong pangutana. Daghang Salamat. — Gerry

Dear Gerry,

Nagtuo ko nga dili lang ikaw ang wa makauyon sa batasan nga gipakita sa ubang senator-judges sa senado atul sa Impeachment trial ni Corona. Bisan kinsa nga mga ordinaryong tawo makuyawan sa ilang gipakita nga batasan kay way limit ang ilang pagpangasaba og pang insulto hinungdan nga ang ubang abogado manampong nalang sa dunggan. Apan labot sa imong pangutana, yes, aduna tay balaod nga nagprotihir sa atong mga testigo nga ipresentar og palingkuron sa witness stand. Basi sa Rule 132, section 3 (1) sa Revised Rules of Court, kini naglatid sa katungod ug obligasyon sa usa ka testigo og sa paragraph 1 kini nagkanayon “To be protected from irrelevant, improper, or insulting questions, and from harsh or insulting demeanor”. Tataw kaayo nga sa maong balaod dili dapat insultuhon o kasab-an ang usa ka testigo ug dili man seguro lisud sabton ang maong provision. Ang mga abogadong-senador nasayud niining maong balaod apan ang nakapait kay wa  kini tumana sa uban ug wa say nakabadlong kanila. Hinaut nga akong natubag ang imong pangutana. — Atty. Divine

Hinuon sa mga trial sa korte, di mahitabo ang mga susamang eksena kay maka object man ang abogado sa pikas habig ug aduna say huwes nga makabadlong busa kun kamo motestigo sa korte segurado gyung di mo makatilaw og susamang pang insulto ug pagpangasaba gawas lang kun ang testigo na sab mismo ang magpabuyag ug dili magtarong og tubag sa mga pangutana. Usahay man gud ang uban natong opisyal sa kagamhanan makalimot kun diin sila gikan tungod sa ilang gahum nga gikuptan makalimot na sila sa pagrespeto sa ilang isig ka tawo. Kun aduna moy pangutana, ipadala lang sa; LEGAL CORNER, Atty. Divine Marcial-Flores, c/o Banat News, corner D. Jakosalem and V. Gullas Sts., Brgy. Sto. Niño, 6000 Cebu City or email sa [email protected]