Sa atong pagsaulog sa World Communications Sunday si Papa Benedicto XVI ang nipahinumdom kanato nga ang pakigkukabildo dili lang kutob sa daghang mga pulong nga malitok hinunoa pinaagi usab sa mahilumong pagpaminaw. Diha sa atong paggamit sa kahimanan sa komunikasyon mahinungdanong atong himoon ang paghilom sa dili pa nato ikahatag ang kinatibuk-an natong pagsalig sa mga impormasyon nga atong nakuha diha sa mga newspapers, radios, television, internet.Tinuod nahimo silang kabtangan alang sa publiko apan wala kini magpasabot nga dili na lang pud gamiton ang atong hunahuna diha sa mapamalandungong pagsala sa mga impormasyon nga atong pagadawaton. Adunay paghunong sa daklit sa kinabuhi sa mga apostoles sa dihang mibiya si Jesus kanila. Nausab ang dagan sa ilang naandang pagkinabuhi kay wala naman ang pisikal nga presensiya sa ilang magtutudlo apan ang maong paghilom ang nagpaabot usab og sinugdanan sa laing hugna sa panlimbasog sa misyon nga ipadayon pagsangyaw sa Maayong Balita ngadto sa tanang mga nasud.