Di makaminyo bisan dugay nang nagbuwag sa bana

Maayong Miyerkules na usab sa atong mga suki sa Banat News. Atong hisgutan karon may kalabutan niining pangutana sa usa ka ginang nga dugay nang buwag sa iyang bana ug ang iyang pangutana kun mamahimo na ba siyang magminyo.

* * *

Dear Atty. Divine,

Maayong adlaw Atty. Divine ug sa imong mga sumusunod sa Banat News. Gusto lang unta ko nga mokonsulta kanimo labot sa akong sitwasyon karon. Minyo ko ug adunay duha ka mga anak apan nagbuwag mi sa akong bana sud na sa 15 ka tuig. Wa na mi communication sa akong kanhi bana ug wa ko masayud kun asa na siya karon. Ang among duha ka anak pulos na adunay trabaho ug kauban nako sa pagpuyo. Aduna na sab koy karelasyon karon atty ug gani usa ni siya sa mitabang nako pagpa-eskwela sa akong mga anak. Ang akong pangutana atty kun mamahimo na ba kong magminyo karon kay dugay na man ming nagbuwag sa akong bana? Unsa may angay nakong buhaton aron ako makaminyo pag-usab? Salamat sa imong pagtubag sa akong pangutana.

— Bebs

Dear Bebs,

Ang gidugayon sa inyong panagbuwag dili na legal nga basihan nga mamahimo na ka nga makaminyo pag-usab. Kay bisan tuod kun 15 ka tuig na mong wa magkita ug way communication sa imong bana, ubos sa atong balaod managtiayon gihapon kamo ug nagpabiling balido ang inyong kaminyuon ug mausab lang kining imong status kun adunay judicial declaration sa korte nga nag-annul sa imong kaminyuon. Kun interesado gyud ka nga magminyo pag-usab, ang maayo nimong buhaton mao ang pagpa-annul sa imong unang kaminyuon pinaagi sa pagpasaka og petition ngadto sa korte. Ang kaminyuon mamahimong ma-annul o madeklarar nga null and void o dili balido sa korte basi sa Art. 35, Art. 36 ug Art. 37 sa atong Family Code. Ang imong abogado mao nay mo-evaluate niini kun aduna bay basihan aron ma-annul ang imong marriage. Ang Civil Registrar strikto na sab karon sa ilang mga rekisitos sa pagkuha og marriage license ug usa sa ilang pangayuon sa magminyo mao ang Certificate of no Marriage kon CENOMAR gikan sa NSO busa wa gyuy mga minyo karon nga makalusot niini. Hinaut nga nakahatag og katin-awan sa imong pangutana kining akong tubag. Daghang Salamat. — Divine

Laing tan-awon usab sa mga magtiayon nga nagbuwag karon sa ilang kaminyuon mao ang ilang mga kabtangan. Kini tungod kay ubos sa atong balaod sa Art. 100 sa Family Code kini nagkanayon nga ang separation in fact kon panagbuwag sa magtiayon dili makaapekto sa ilang regime of absolute community gawas lang kun adunay deklarasyon na sa korte nga sila buwag legally. Sa ato pa, ang butang o property nga mapalit sa asawa o bana aduna gihapoy katungod ang usa’g usa bisan kon sila nagbuwag na. Kun aduna moy pangutana, ipadala lang sa; LEGAL CORNER, Atty. Divine Marcial-Flores, c/o Banat News, corner D. Jakosalem and V. Gullas Sts., Brgy. Sto. Nino, 6000 Cebu City or email sa [email protected]