Ang adlaw sa mga inahan

Gihimo sa lainlain nga paagi sa mga Pilipino ang pagsaulog sa adlaw sa mga inahan nga gihimo dinhi sa nasud sa matag ikaduhang Domingo sa Mayo sa matag tuig. Naglakip sa paagi sa ilang pagsaulog sa maong adlaw mao ang pagtimbaya sa ilang inahan og “Happy Mother’s Day” sayo sa ilang pagmata sa sayong kabuntagon.

Adunay gihimo lamang pinaagi sa pag-amen ug pagtimbaya, paggakus o pagtimbaya pinaagi sa pagtawag sa cellphone alang sa atua sa layo atol sa maong adlaw ug labaw sa tanan mao ang paghatag og gasa nga mga kinaham niining butang sama sa alahas, paghatag og mga pongpong nga bulak o ang paghatag niini og makabusdik ug makabuhong nga pagkaon nga pagasaw-an sa tibuok sakop sa pamilya.

Matud pa nila nga makiangayon lamang nga pasidunggan ang mga inahan tungod kay mao man kini ang nahimong suga nga ang kahayag iyang gipadan-ag sa tibuok panimalay sa pagsiguro nga ang tanang sakop sa pamilya dili magsukarap sa paglakaw taliwala sa kangitngit.

Daghan ang nag-ingon nga angay gayod nga masayran nga ang matag ikaduhang Domingo sa bulan sa Mayo dungan nga gisaulog sa tibuok kalibutan ang adlaw sa mga inahan.

Matud pa nila nga daghan ang mga nahimong hinungdan nga gisaulog ang maong adlaw sukad sa mga tuig nga wala pa mahimugso si Ginoong Hesukristo. Gitataw hinuon nila nga labaw lamang kining gipahimug-atan ang maong adlaw sa kasaulogan sa mga inahan human sa pagsilot og kamatayon ni Ginoong Hesukristo sa mga Hudiyo sa paghatag og pag-ila sa mga Krisitiyanos sa mga gihambin nga kasakit ni Birhen Maria.

Didto sa nasud sa Englatira ang pagsaulog sa adlaw sa mga inahan ilang gipahigayon sa matag ikaupat nga Domingo ug adunay mga sugyot nga matag Hunyo 2 kini saulogon hangtod na nga nahimong ikaduhang Domingo sa bulan sa Mayo pinaagi usab sa Mother’s Day Proclamation nga gihimo sa Estados Unidos human sa Ikaduhang Gubat nga kalibotanon.

Niining mga panahona ang adlaw sa mga inahan gisaulog kini sa mga nasud sa Estados Unidos ug Pilipinas, ang adlaw sa mga inahan gisaulog usab sa mga nasud sama sa United Kingdom, India, Denmark, Finland, Italy, Turkey, Australia, Mexico, Cabada, China, Japan ug Belgium. (Romeo T. Limpangog)