EDITORYAL- Unsay labot ni P-Noy sa impeachment ni Corona Ni Wen Celen

May mga survey kuno nga nagbutyag nga daghang mga tawo nga mituo nga ang impeachment trial ni CJ Corona usa ka panimawos ni Presidente P-Noy kay si Corona may nagbuot nga ihatag sa mga kabus ang Hacienda Luisita.

Ibutang nga tinuod kini tungod kay isip usa sa mga tag-iya sa maong hacienda di kalikayan nga bation gayud og kahiubos si P-Noy sa Chief Justice.

Apan kumo kay legal man ang gibasehan  ni Corona sa maong pagbahin-bahin sa maong katigayonan ngadto sa mga nanagtikad nga mag-uuma niini, sakit man apan igo lang sa pagpanghupaw ang mga hingtungdang tag-iya niini.

Apan kun kulitogon ang sinugdanan nganong gi-impeach si Corona, mura mag didto ni magsugod sa pagka-midnight appointee niya ni kanhi Presidente Arroyo.

Hangtud nga nabaniog ang kadaghan niyang condominium, mga kayutaan ug uban pang katigayonan ug mga kuwarta sa bangko.

Tungod niini misangpot ang mga magbabalaod sa desisyon   nga sutaon ang pagkatawo ug pagka-opisyal ni Corona sa kagamhanan ilabi na niadtong may mga anino na sa mga katahap nga nagpahipi sa ilang galamhan batok sa chief justice.

Aron sa pagsuta sa kamatuoran nahukman sa mga magbabalaod nga imbistigahon si Corona pinaagi sa impeachment court.

Sa ubay-ubay na nga na-impeach nga mga opisyal, may pipila na kanila nga nakatilaw na og silot sama kang kanhi   Presidente Estrada.

Pinaagi sa impeachment napugos og hikog si kanhi   DENR Secretary Reyes .

Dinhi mamatud-i nga ang pag-impeach og dagkong opisyal sa goberno nagsukad dihang may nanimahong aso sa ilang pagkatawo ug sa ilang pagka-opisyal sa kagamhanan.

Ang maong panukdanan di bag-o kundi mao kini ang gitawag nga standard operating procedure (SOP) nga gipatuman sa goberno.

Busa unsa may labot sa isyu bahin sa Hacienda Luisita kun imong tutokan ang isyu sa pagka-impeach ni Corona. Di   ba?