Ang tawhanong kalibutan

Kun maghisgot kita og kalibutan dili kini siya sabton nato nga geographical, territorial, o biological lamang. Apan sabton nato ang Tawhanong Kalibutan ingon nga usa ka kalibutan nga malambigiton nila kun sa proseso nga gitawag nato'g kinabuhi. Sa maong liyok sa kinabuhi, nahimong konektado ang tanan. Gikan sa dagko ngadto na tingali sa gagmay nga mga micro-organisms adunay kalambigitan sa usa’g-usa. Matag tawo matud pa usa ka kalibutanon. Matag kalibutan usa ka tawhanong kalibutan.Pinasikad ning maong baruganan ato karong tukion ang atong kahimtang ingon nga tawo nga malambigiton ngadto sa mga tawong malambigiton usab sama kanato. Sa panahon nga kita makiglambigit , ang tawo o panghitabo nahimong makahulogan alang kanato. Ug kay makahuloganon man kini, atong gihatag ang kinatibuk-an sa atong kaugalingon kalabot niini. Sama pananglitan sa buhat sa pakighilawas. Kun ikaw bana nakighilawas sa imong asawa uban ang kinatibuk-ang tinguha, pagbati, hunahuna nga imong gihatag sanglit makahuloganon siya alang kanimo nan usa kadto ka tawhanong akto. Apan kun ang usa o duha ka mga tawo nakighilawas lamang apan walay paghinatagay og kahulogan sa presensiya sa usa’g-usa ang nahimong nagginamitay lamang o nitan-aw sa mga kaugalingon ingon nga mga butang ug dili mga tawo. Sa English kini gitawag og: THINGIFY.