Miss Mandaue sa bag-o nga convention hall

Daghan ang nag-ingon nga ang bulan sa Mayo sa matag tuig maoy labing daghan nga pangilin o piyesta nga saulogon bisan sa kapilya sa usa ka sitio, barangay, lungsod ug mga dakbayan.

Nagkalainlain ang pasiugdahan nga kalingawan sa matag pahigayon og piyesta sama sa pagpahigayon og drama sa entablado, variety show, disco ug labi na gayod ang pagpahigayon og indigay sa kaanyag o beauty contest.

Dinhi sa ato sa Sugbo maoy naila nga magsaulog sa tinuig nga pangilin ang dakbayan sa Mandaue sa paghatag og pasidungog sa patron nga si Senyor San Jose.

Ang kagamhanan sa dakbayan sa Mandaue adunay gihan-ay nga lainlain nga kalingawan sa matag gabii hangtod na kini sa Mayo 8 nga maoy kapistahan sa maong dakbayan.

Ang usa sa mga nabantog na nga kalingawan nga hugopan sa pagtan-aw sa mga lumolupyo sa kabarangayan mao ang Miss Mandaue nga pagatapuson pinaagi sa coronation night sa Mayo 6 kun duha ka adlaw sa dili pa ang kapistahan sa maong dakbayan.

Ang coronation night kaniadto sa nangaging tinuig nga pangilin anha pagahimoon sa atubangan sa city hall kun maayo ang kahimtang sa panahon.

Gihimo usab ang coronation night sa Miss Mandaue dihang natukod na ang sports complex sa sitio Tribunal sa barangay Centro hangtod nga na sa Cebu International Convention Center sa pagkatukod na usab niini.

Niining tuiga ang coronation night sa Miss Mandaue 2012 adto pagahimoon sa bag-o pa nga convention hall sa J. Mall Center sa dalan A.S. Fortuna sa barangay Banilad ug kini naghatag usab og kahigayon sa mga molupyo sa silingan nga barangay sama sa Bakilid, Banilad, Maguikay, Casuntingan ug Cabancalan.

Daghan ang nag-ingon nga nindot ang maong convention hall sa J Mall apan dili usab ikatandi iyang kanindot ug gidak-on sa CICC nga sagad gipahigayon ang mga dinagkong panagtigom sa mga magpapatigayon ug mga barangay opisyal sa tibuok lalawigan. (Romeo T. Limpangog)