Ehersisyo nga naglingkod

Sa mga tawong may kakulian o kanang nagtrabaho sa opisina nga tibook adlaw nga naglingkod, makahimo usab sa pag-ehersisyo pinaagi sa paglingkod lang. Nianing paagiha, makahatag kinig kaligdong sa imong pamarog ug kalig-on sa taas nga bahin sa imong likod. Ingon niani ang imong buhaton:

Magsugod sa imong siko, ibukhad ang mga kamot mo ug ipataas nga morag mihurar. Unya dungang isaka ang abaga, dayon ilubag o ikyugpos kini ug itulod paubos ang mga siko paingon sa may bat-ang o sa may lubotan mo.

Magpabilin ang maong posisyon, sud sa 5 hangtud 10 ka segundos, ug unya hinay-hinaya nga ibalik sa normal o relaks nga posisyon. Balikbalika kining maong posisyona. Mahimong buhaton kini sa 5 ka balikbalik kun bag-o pang nagsugod sa pag-ehersisyo. Kun maanad kana, agda lang ang lahutay mo.

Sa madugayan, imong mabatian nga mahimong mas masayon na nimo nga ibukhad sa paglihok ang imong dughan ug imo sab mamatikdan nga ang imong ugat o muscles sa abaga molig-on ug mobaskog nga dili na pahoy.

Dunay laing posisyon ini, alang sa pagpanipis o pagpagamay sa tiyan. Nakatabang sad ni sa paghilis sa bilbil. Ang pagsugod nianing matang nga ehersisyoha pinaagi sa posisyon nga maglingkod. Unya ipiton ang bilbil sa tiyan nga iduko ang lawas hangtud nga maipit gyud. Ipabilin ang maong posisyon sud sa 5 ngadto 10 ka segundos ug balika-balika sud sa 5 ka beses.

 Kun maanad kana ning tanan, buhata ni katulo sa usa ka adlaw kada 1 ka oras sa di pa mokaon o 2 ka oras human sa kaon. Igo lang sad ang imong kaonon.