Balhin-balhin

Nagsugod na ang binalhinay og rehistro sa mga politiko nga buot magpabilin sa posisyon bisan kun mapupos na ang ilang termino sunod tuig ug dili na makahimo sa pagpasubli sa katungdanan nga ila karong gihuptan.

Dinhi sa dakbayan duha ka mga sakop sa konseho ang mibalhin og puyo aron lang gyud makapapili sa sunod eleksiyon. Unang mibalhin og parehistro si konsehal Augustus Pe Jr. ug misunod niya kagahapon si konsehal Yayoy Alcoseba.

Samtang karong adlawa, kun walay kausaban sa plano, gipaabot pud ang pagbalhin ni Gobernador Gwendolyn Garcia sa iyang registration gikan sa lungsod sa Dumanjug paingon sa Barili. Si Pe mibalhin sa iyang registration gikan sa north district diin siya kasamtangang nagrepresentar sa konseho paingon sa south district.

Si Alcoseba usab gikan sa dakbayan sa Sugbo paingon sa dakbayan sa Carcar. Ang tulo ka mga opisyal managsama nga anaa sa katapusang termino ug dili na makahimo sa pagpasubli sa ilang pwesto. Silang tulo managsama sab og tumong sa ilang pagbalhin nga mao ang pagpangandam sa sunod eleksiyon.

Si Pe nagtinguha nga molansar og balik pagkakonsehal sa dakbayan apan tungod kay dili naman siya makahimo pagpa-reelect didto sa norte mibalhin siya sa south aron didto mopapili. Si Alcoseba mibalhin sab sa Carcar tungod kay giingong naglaraw kuno pagpapili isip sakop sa hunta probinsiyal sa Sugbo.

Si Garcia tataw sab nga nangandam sa sunod niyang plano sa politika human sa iyang termino isip gobernador. Ang iyang pagbalhin nagpasabot lang og usa ka butang. Dili pa siya andam mobalik sa pribadong sector.

Hinuon daghan pa og kahigayonan nga nagpaabot niya sa politika. Gani lakip siya sa mga gitan-aw nga posibling kandidato pagkasenador sa mga nasudnong partido. Apan nganong kinahanglang mobalhin og parehistro ang gobernador kun nasudnong posisyon maoy iyang daganan sa 2013 elections?

Simple ra ang tubag niini, kun maayo ang showing sa survey ug kun makita niya ang dako nga kahigayonan sa pagdaug modagan si Garcia pagkasenador. Apan kun sa iyang tan-aw lisud ang kahigayonan, pagkakongresista sa 3rd district maoy iyang daganan.

Kini maoy rason nga nangandam siyang daan pinaagi sa pagbalhin sa iyang registration didto sa Barili. Ang iyang manghud nga si Pablo John Garcia dako kaayo og kahigayonan nga maoy mopuli niya pagkagobernador. Sa bagay hinog na si Pablo John alang sa maong pwesto. Sukad pa sa sinugdan plano na sa mga Garcia nga si Pablo John maoy mosunod sa pagdumala sa probinsiya.

* * *

Sa tulo hinuon ka mga opisyal nga namalhin ug mobalhinay pa sa ilang registration way makatupong sa kagarapal sa gihimo ni Pe. Kini tungod kay samang konseho ang gusto niyang serbisyohan bisan pa kun mibalhin siya og distrito.

Bisan pa og adto siya sa south district mopapili apan konseho lang gihapon sa dakbayan maoy iyang sangkuan kun siya modaug. Kun ganahan gyud siya molansar nganong dili naman lang siya mobalhin og laing dapit aron adto siya molansar. O dili ba kaha molansar nalang siya og presidente sa kapilya.

* * *

[email protected]