Hilaw nga kadaugan

Sa kapin usa ka gatos nga pahina nga hukom ni Judge Soliver Peras gikonbikto niini si Kongresista Ruben Ecleo Jr. ug gipabilanggo sulod sa 40 ka tuig. Gawas sa pagka priso gipabayad usab ang kongresista og 25 milyones ka pesos isip damages.

Tungod sa pagka konbikto sa kongresista nalipay pag maayo ang mga nahabilin sa pamilyang Bacolod, ang mga sakop sa Crusade Against Violence nga nagbantay sa kaso ug ang mga abogado nga miboluntaryo sa pag-prosecute sa kaso.

Apan ang mga abogado sa kongresista never say surrender. Mangayo sila og reconsideration sa hukom. Gusto nilang ipausab ang nahimong hukom ni Judge Soliver Peras tungod kay wala niini masabti pagmaayo ang ilang kaso. Ang mga abogado sa kongresista hugot gayod sa ilang baruganan ug pagtoo nga ang nakit-an nga patay’ng lawas didto sa Coro, Dalaguete, Cebu dili iyaha kang Alona o sa biktima kun dili iya kini sa lain nga tawo tungod kay wala motakdo sa patay nga napalgan ang iyang gitas-on ug gidak-on.

Bitaw upod no? Kay sayonan mo niana kun pananglitan gipriso ka na kay gikonbikto tungod sa kasong pagpatay apan dako diay’ng buhi ang giingong imong gipatay? Unsaon nalang pagbalik sa nawagtang nimong kagawasan. Dili ra ba seguro puwede nga patyon ang tawong giingong imong gipatay maong napriso ka pero dako diay’ng buhi? Aduna na baya’y susama niining kaso nga nahitabo didto sa kaulohan diin ang mga sakop sa pamilya nagbangotan tungod sa kamatayon sa ilang anak. Ang patay’ng lawas sa ilang giingong anak gibilaran ug gilimosan apan sa katapusang adlaw sa pagbilar mikalit lang og tunga ang anak nga ilang gibilaran kay dakong buhi. Gani may kuyog pa kining babaye kay nagtaban diay sa iyang uyab. Maayo gani kay wala pay napasakaan og kaso niadtong panahona! Kun diha pa unsaon na lang! 

Ang kadaugan nga naangkon sa prosecution hilaw pa tungod kay dili pa final ang hukom sa husgado. Aduna pay 15 ka adlaw ang depensa sa pagsumiter sa ilang Motion for Reconsideration aron mapausab ang naunang hukom ni Judge Soliver Peras. Kun dili man usbon sa huwes ang iyang hukom, ang mga abogado sa kongresista makadangop pa sa Court of Appeals ug human sa Court of Appeals ngadto sa Korte Suprema. Busa dili pa mahimong magmaya pag maayo ang prosecution tungod kay aduna pay kahigayonan nga didto sa labaw nga hukmanan maabsuwelto si Ruben Ecleo Jr. sa iyang kaso.