Ako ra ni Centenarians Act

Dunay balaudnon sa Ubos Balay Balauranan (House of Representatives) diin kun mamahimo na kining usa ka balaud nganlan kini nga Centenarians Act.

* * *

Ubos niining balaudnon, kadtong mga Pilipinhon nga nagpangidaron og 100 years old pahalipayan sa gobyerno og P100,000 plus usa ka congratulatory letter gikan sa presidente sa nasud.

* * *

Gawas sa pahalipay nga P100,000 ang lokal nga kagamhanan pahatagon usab og dugang pahalipay.

* * *

Ang maong balaudnon gipangamahanan ni Rep. Edcel Lagman, ang dakong lider sa oposisyon sa Kongreso.

* * *

Nagkadaiya ang reaksiyon sa mga tigpaniid kalabot niining balaudnon ni Kongresista Lagman. Naay nag-ingon nga makapasibot kini sa mga edaran na sa pagpaninguha nga makab-ot ang pangidaron nga 100 years old.

* * *

Naa say misugyot nga ang pahalipay himoon nga retroactive kay matud pa nila tagsa ra ang makaabot sa edad nga 100 ka tuig. Ug uban nga nakaabot na sa maong edad nangamatay na.

* * *

TRIVIA. Mangumusta kita sa atong mga higalang-magbabasa diha sa Banawa, Guadalupe area. Daghang salamat sa inyong nagpadayong suporta sa Banat News.