Maayong adlaw kaninyong tanan. Usa ka email ang akong nadawat gikan sa usa ka ginang nga adunay lima ka mga anak ug gibiyaan sa iyang bana kay mikuyog og laing babaye. Ang iyang problema kay wa gyud mohatag og financial support ang iyang bana sa ilang mga anak. Busa mao kini nga pangutana ug problema ang atong tubagon karon.
Dear Atty. Divine,
Usa ko sa nagsunod sa imong column sa Banat News. Nag email ko nimo tungod sa problema sa akong mga anak kay gibiyaan mi sa ilang amahan. Ang akong kamaguwangan nagtungha na sa college, aduna koy duha ka estudyante sa high school ug duha sa elementary. Sukad mi nga gibiyaan sa akong bana niadtong miaging tuig wa gyud siya mohatag og financial support sa iyang mga anak. Gitawgan na siya sa akong mga bata kay naa man ni siya magtrabaho sa usa ka inilang restaurant isip Chef Cook apan pulos lang siya saad. Nasayud ko nga anaa na siyay laing babaye nga gikatipon karon. Nagkalisud na kaayo ko atty ug di na nako makaya ang expenses namo ilabi na inigbukas sa klase karong Hunyo.Ang akong pangutana atty unsay akong buhaton aron mapugos sa paghatag og financial support ang akong bana sa among mga anak?Hinaut imo kong matabangan niini. — Karen
* * *
Karen,
Salamat sa imong pag-email. Basi sa atong balaod sa Family Code, nalatid sa Art. 195 ug Art. 196 kun kinsa kadtong mga tawo nga adunay obligasyon sa paghatag og suporta sa usa’g usa ug kini naglakip sa magtiayon ug mga ginikanan nga obligado gyud nga mosuporta sa ilang kapikas ug sa ilang mga anak, legitimate man o illegitimate. Ang suporta nga ilang ihatag naglakip sa inadlaw nga gastuhan sa mga bata sama sa pagkaon, senina, tambal, edukasyon, transportasyon ug uban pang panginahanglan. Busa aduna kay katungod nga mangayo og financial support sa imong bana alang sa inyong mga anak. Ang una nimong buhaton mao ang pagpadala kaniya og demand letter alang sa suporta sa inyong mga anak. Kun ugaling di gyud siya mohatag mas maayo nga imo nang ipaagi sa korte ang pagpangayo og legal support sa imong mga bata aron kun mapakyas siya sa pagtuman mamahimo siyang ma-contempt. Suwayi sa pag-adto ang Public Attorney’s Office kon PAO o ang Integrated Bar of the Philippines kon IBP kay anaa na silay mga programa nga maghatag og libreng legal nga serbisyo sa mga nagkinahanglan aron imong mapasaka ang imong petition sa korte alang sa pagpangayo og legal support sa imong bana alang sa inyong mga anak. Daghang Salamat. — Atty. Divine
Kining paghatag og Legal support, nalatid sab kini sa Republic Act No. 9262 kon Anti-violence against Women and their children Act of 2004 nga diin mamahimong ikiha ug mapahamtangan og silot ang bana o amahan nga magdumili sa pagsuporta sa iyang kapikas ug sa iyang mga anak. LEGAL CORNER, Atty. Divine Marcial-Flores , c/o Banat News, corner D. Jakosalem and V. Gullas Sts., Brgy. Sto. Niño, 6000 Cebu City or email sa flores_divina@yahoo.com